మాజీ క్రికెటర్ రోహిత్ శర్మ మృతి.. చిన్న వయసులోనే..!

క్రికెట్​ ఫ్యాన్స్​కు ఓ బ్యాడ్ న్యూస్. వెటరన్ క్రికెటర్ రోహిత్ శర్మ కన్నుమూశాడు. అతడి వయసు 40 సంవత్సరాలు. గత కొంత కాలంగా కాలేయ సంబంధింత వ్యాధితో రోహిత్ బాధపడుతున్నాడు. అయితే పరిస్థితి విషమించడంతో చికిత్స పొందుతూనే తుదిశ్వాస విడిచాడు. డొమెస్టిక్ క్రికెట్​లో అతడు రాజస్థాన్​కు ప్రాతినిధ్యం వహించాడు. కెరీర్ మొత్తంలో 7 ఫస్ట్​క్లాస్ మ్యాచ్​లు, 28 లిస్ట్​-ఏ మ్యాచ్​లు, 4 టీ20 మ్యాచ్​లు ఆడాడు రోహిత్ శర్మ. రైట్ హ్యాండ్ బ్యాట్స్​మన్ అయిన అతడు.. అవసరాన్ని బట్టి స్పిన్ బౌలింగ్​తోనూ జట్టుకు వికెట్లు అందించేవాడు.

రాజస్థాన్ మాజీ క్రికెటర్ అయిన రోహిత్ శర్మ తన కెరీర్​లో 1,147 పరుగులు చేయడంతో పాటు 7 వికెట్లు పడగొట్టాడు. లిస్ట్​-ఏ క్రికెట్​లో అతడి పేరు మీద 2 సెంచరీలు కూడా ఉన్నాయి. 2014లో ప్రొఫెషనల్ క్రికెట్​కు గుడ్​బై చెప్పిన తర్వాత నయా క్రికెటర్లను తయారు చేసే పనిలో పడ్డాడు రోహిత్. ఈ క్రమంలో ఓ అకాడమీని స్థాపించాడు. అందులో కోచ్​గా సేవలు అందిస్తున్నాడు. యంగ్ ప్లేయర్స్​కు క్రికెట్ పాఠాలు చెబుతూ కాలాన్ని వెల్లదీస్తున్నాడు. అయితే కొన్నాళ్లుగా లివర్ సమస్యతో ఇబ్బంది పడుతున్న రోహిత్.. జైపూర్​లోని ఓ ప్రైవేట్ ఆస్పత్రిలో చికిత్స పొందుతూ నిన్న తుదిశ్వాస విడిచాడు. దీంతో రాజస్థాన్ క్రికెట్​లో విషాదం నెలకొంది. అతడి మృతికి అభిమానులు సంతాపం వ్యక్తం చేస్తున్నారు. చిన్న వయసులోనే కన్నుమూయడం బాధాకరమని అంటున్నారు.

ఇదీ చదవండి: సురేశ్ రైనా సునామి ఇన్నింగ్స్! ఈ వయసులో కూడా ఇదేమి కొట్టుడు స్వామి?