ఖైదీ 2 వస్తుంది కానీ

నా పేరు శివ, ఊపిరి తర్వాత సరైన సక్సెస్ లేక తెలుగు మార్కెట్ లో ఇబ్బంది పడిన కార్తీకి ఖైదీ ఎంత పెద్ద బ్రేక్ ఇచ్చిందో తెలిసిందే. దీనికి కొనసాగింపు ఉంటుందని దర్శకుడు లోకేష్ కనగరాజ్ అప్పట్లోనే చెప్పాడు.కట్ చేస్తే ఇప్పుడు విక్రమ్ లాంటి బ్లాక్ బస్టర్ సక్సెస్ వచ్చాక ఖైదీ 2 మీద అంచనాలు అమాంతం పెరిగిపోయాయి. కమల్ సూర్యలు విక్రమ్ లో ఉన్నప్పటికీ కార్తీకి మాత్రం కేవలం గొంతు వినిపించి మేనేజ్ చేశాడు లోకేష్. కానీ పార్ట్ 2లో ముగ్గురు కలుస్తారనే అంచనాలో అభిమానులు ఉన్నారు. అయితే ఈ రెండు వేర్వేరు సీక్వెల్స్ తో వస్తాయా లేక హాలీవుడ్ మల్టీ యునివర్స్ టైపు లో మిక్స్ చేసుకుని థ్రిల్ ఇస్తాయా అనేది ఇప్పుడే చెప్పలేం.

ఖైదీ 2 షూటింగ్ కు సంబంధించి కార్తీ క్లారిటీ ఇచ్చాడు. లోకేష్ కనగరాజ్ త్వరలో చేయబోయే విజయ్ సినిమా పూర్తి కాగానే దీన్ని సెట్స్ పైకి తీసుకెళ్తామని చెప్పాడు. ఢిల్లీ పాత్ర జైలుకు ఎందుకు వెళ్ళింది, భార్య లేక బిడ్డను ఎందుకు హాస్టల్ లో ఉంచాల్సి వచ్చింది, అసలు విలన్ గ్యాంగ్ తో శత్రుత్వం ఎలా వచ్చింది లాంటి ప్రశ్నలన్నింటికి అందులో జవాబు ఇవ్వబోతున్నారు. ఈ కోణంలో చూస్తే ఖైదీని విక్రమ్ తో ముడిపెట్టలేం. రెండు విడివిడిగా చూస్తే చాలా స్పాన్ ఉన్న పెద్ద కథలు. ప్రస్తుతం విజయ్ దిల్ రాజు నిర్మిస్తున్న వారసుడులో బిజీగా ఉన్నాడు. నవంబర్ లోగా దాన్ని ఫినిష్ చేసే ప్లానింగ్ లో ఉన్నారు. అది కాగానే తనకు మాస్టర్ ఇచ్చిన లోకేష్ తో చేతులు కలుపుతాడు

ఇక కార్తీ విషయానికి వస్తే తన కొత్త మూవీ విరుమాన్ ఆగస్ట్ 12న విడుదల కానుంది. టైం లేకపోవడంతో పాటు థియేటర్ల కొరత వల్ల తెలుగు వెర్షన్ రావడం లేదు. ఒకవేళ అక్కడ హిట్ అయితే అప్పుడు ప్లాన్ చేసుకుంటారు. ట్రైలర్ మాత్రం రొటీన్ అనే ఫీలింగే ఇచ్చింది. చినబాబు తరహాలో ఓవర్ డ్రామా సెంటిమెంట్ తో నింపేశారు. మనవాళ్లకు నచ్చే అవకాశాలు తక్కువే. అయితే నెక్స్ట్ రాబోయే సర్దార్ మీద మాత్రం మంచి అంచనాలు ఉన్నాయి. డ్యూయల్ రోల్ చేయగా అందులో ఒక పాత్ర ముసలి వేషం కావడం ఆసక్తి రేపుతోంది. మొత్తానికి ఖైదీ 2 ఎప్పుడు వచ్చినా దానికొచ్చే క్రేజ్ మాత్రం మాములుగా ఉండదన్నది వాస్తవం.