సాధారణంగా ప్రతి సంవత్సరం సూర్య గ్రహణాలు, చంద్ర గ్రహణాలు ఏర్పడతాయి. కొన్ని పాక్షికంగా ఏర్పడితే కొన్ని పూర్తిగా ఏర్పడతాయి. ఒక సంవత్సరంలో ఒకటి కంటే ఎక్కువ గ్రహణాలు కూడా ఏర్పడతాయి. ఈ ఏడాది 2022లో తొలి సూర్యగ్రహణం ఈ నెల ఏప్రిల్ 30న ఏర్పడనుంది. అయితే ఇది పాక్షిక సూర్యగ్రహణం.
ఈ ఖగోళ ఘటన ఈ నెల రెండో అమావాస్య రోజే ఏర్పడనుంది. దీన్ని బ్లాక్ మూన్(Black Moon) అని కూడా పిలుస్తారు. సూర్యునికి భూమికి మధ్య చంద్రుడు అడ్డుగా వచ్చినప్పుడు, భూగ్రహం మీద ఆ నీడ పడినప్పుడు సూర్యగ్రహణాలు క‌నిపిస్తాయి. ఈ 2022లో చంద్రుడు సూర్యుడిని పాక్షికంగా అడ్డుకోవడంతో పాక్షిక గ్రహణం ఏర్పడుతుంది.
ఈ సూర్యగ్రహణం ఏప్రిల్ 30 శనివారం మధ్యాహ్నం 12.15 గంటలకు ప్రారంభమై మే 1న ఉదయం 04.07 గంటలకు ముగుస్తుందని నాసా శాస్త్రవేత్తలు తెలిపారు.
ఈ పాక్షిక సూర్యగ్రహణం భారత్ లో కనిపించదని తెలిపారు. ఆ సమయంలో భారత్‌లో కొద్దిగా చీకటిగా ఉంటుందని అన్నారు. ఈ పాక్షిక సూర్యగ్రహణం దక్షిణ అమెరికా, అంటార్కిటికా, దక్షిణ మహాసముద్ర ప్రాంతాలకి పూర్తిగా కనిపిస్తుందని, ఆకాశం నిర్మలంగా ఉంటే చిలీ, ఉరుగ్వే, పశ్చిమ పర్వాగ్వే, అర్జెంటీనా, బొలీవియా, పెరూ, బ్రెజిల్‌ దేశాలలో కూడా సూర్యాస్తమయం సమయంలో గ్రహణం కనిపిస్తుందని నాసా పేర్కొంది.
