Dharani
Dharani
పేద, ధనిక అనే తేడా లేకుండా బడుగు, బలహీన వర్గాల వారి పిల్లలు సైతం చక్కగా చదువుకోవాలని.. వారికి నాణ్యమైన విద్య అందించడం కోసం కేంద్ర, రాష్ట్ర ప్రభుత్వాలు అనేక కార్యక్రమాలను తీసుకొచ్చాయి. అంతేకాక ఆర్థికంగా వెనకబడిన కులాలు, ఇతర వెనకబడిన వర్గాలకు చెందిన ప్రతిభావంతులైన పాఠశాల విద్యార్థులను ప్రోత్సాహించేందుకు కేంద్ర ప్రభుత్వం ప్రత్యేకంగా ఒక స్కాలర్షిప్ పథకాన్ని అమలు చేస్తోంది. దీని ద్వారా వెనకబడిన వర్గాలకు చెందిన ప్రతిభావంతులైన విద్యార్థులకు ప్రతి ఏటా రూ.75 వేల నుంచి 1.25 లక్షల రూపాయల వరకు స్కాలర్షిప్ అందజేస్తోంది. మరి ఈ పథకం ఏంటి అంటే.. పీఎం యశస్వి యోజన. మరి ఈ పథకానికి ఎవరు అర్హులు.. ఎలా అప్లై చేసుకోవాలి వంటి పూర్తి వివరాలు..
9వ తరగతి నుంచి 11వ తరగతి చదువుతున్న విద్యార్థులందరూ ఈ పీఎం యశస్వి యోజన పథకానికి అర్హులే. 11వ తరగతి అంటే ఇంటర్మీడియట్ మొదటి సంవత్సరం చదువుతున్నవారు, సీబీఎస్ఈ ప్లస్ వన్ చదువుతున్న విద్యార్థులు ఈ పథకానికి అర్హులవుతారు. 9వ తరగతి విద్యార్థులకు ఏడాదికి రూ.75 వేలు, 11వ తగతి విద్యార్థికి రూ.1.25లక్షల వరకు ఉపకారవేతనం అందిస్తారు. ఈ పథకానికి అప్లై చేసుకునే విద్యార్థుల కుటుంబ వార్షికాదాయం ఏడాదికి 2.50 లక్షల రూపాయలకు మించకూడదు.
ప్రవేశ పరీక్ష నిర్వహించి, ఇందులో మెరిట్ ప్రకారం విద్యార్థులను ఎంపిక చేస్తారు. కేంద్ర ప్రభుత్వానికి చెందిన నేషనల్ టెస్టింగ్ ఏజెన్సీ (ఎన్టీఏ) ఈ ప్రవేశ పరీక్షను నిర్వహిస్తుంది. హిందీ, ఇంగ్లీష్ భాషల్లో పరీక్ష ఉంటుంది.
ఈ పథకానికి అప్లై చేసుకోవాలనుకుంటే విద్యార్థులు పూర్తిగా ఆన్లైన్ ద్వారానే దరఖాస్తు చేసుకోవాల్సి ఉంటుంది. ఇందుకోసం కేంద్ర ప్రభుత్వ ఉన్నత విద్యాశాఖ, నేషనల్ టెస్టింగ్ ఏజెన్సీ వెబ్ పోర్టల్ను ఏర్పాటు చేసింది. ఇదే https://yet.nta.ac.in/frontend/web/site/login ఆ వెబ్సైట్. ఈ పథకానికి అర్హులైన విద్యార్థులు.. ఈ వెబ్సైట్కు వెళ్లి అప్లై చేసుకోవాలి.
ఈ నెల అంటే ఆగస్టు 10వ తేదీలోపు దరఖాస్తు చేసుకోవడానికి చివరి తేదీ. ఆ రోజు రాత్రి 11.50 నిమిషాల వరకు ఈ వెబ్సైట్ దరఖాస్తు చేసుకోవడానికి అందుబాటులో ఉంటుంది. ఆ తర్వాత ఆన్లైన్లో దరఖాస్తు చేసుకోవడం కుదరదు. ఇందుకోసం ఒక్క రూపాయి కూడా చెల్లించాల్సిన అవసరం లేదు. సెప్టెంబర్ 29న పరీక్ష నిర్వహిస్తారు. మార్పులు ఉంటే వెబ్సైట్లో తెలియజేస్తారు.
