Lal Salaam: లాల్ సలామ్ ఆడియో ఈవెంట్ లో ఎమోషనల్ అయిన రజినీకాంత్

సూపర్ స్టార్ రజినీకాంత్ నటించిన లాల్ సలామ్ ఆడియో లాంచ్ ఈవెంట్ కొన్ని రోజుల క్రితం జరిగింది.. మరియు ఆదివారం ఆ ఈవెంట్ ఆన్‌లైన్‌లో విడుదలైంది. ఇక ఆడియో లాంచ్‌లో, రజినీకాంత్ గత కొంతకాలంగా తన పైన వస్తున్న వివాదాలు, ఆరోపణల గూర్చి మాట్లాడుతూ భావోద్వేగానికి లోనయ్యారు. తమిళ స్టార్ హీరో విజయ్‌తో తనకు ఏదో సమస్య ఉందన్న వాదనని త్రోసి పుచ్చారు. తన మాటలను వేరే అర్థంలో తీసుకోవద్దని అభిమానులను, ప్రేక్షకులను ఆయన అభ్యర్థించారు.

“నేను కాకి మరియు డేగ కథను సాధారణంగా చెప్పాను. కానీ సోషల్ మీడియాలో, నేను విజయ్‌ని ఉద్దేశ్యించి అన్నట్లుగా వ్యాపించింది. నేను నిజంగా అలా ఉద్దేశించలేదు, ”అని రజినీ జైలర్ ఈవెంట్‌లో తన మునుపటి స్పీచ్ గురించి మాట్లాడుతూ స్పష్టం చేయడంతో ఇద్దరు హీరోల అభిమానుల మధ్య మాటల యుద్ధానికి శుభం కార్డు పడింది. ‘విజయ్‌ని చిన్నప్పటి నుంచి చూశాను. తను కఠోర శ్రమతో పెద్ద స్టార్‌గా ఎదిగాడు’’ అని సూపర్‌స్టార్‌ గుర్తు చేసుకున్నారు. ఈ ఈవెంట్‌లోని మరో ప్రధాన హైలైట్ ఏమిటంటే, రజనీకాంత్‌ను సంఘీ అని ప్రజలు అభివర్ణించడం పై ఐశ్వర్య రజినీకాంత్ చేసిన స్పీచ్. “రజినీకాంత్ సంఘీ కాదు, ఆయన సంఘీ అయితే లాల్ సలామ్ వంటి సినిమాని అంగీకరించరు” అని ఆమె భావోద్వేగంతో చెప్పారు. అదే సమయంలో రజినీ కూడా కన్నీళ్లు పెట్టడం చూడవచ్చు.

సంఘీ అనేది రాజకీయ నాయకులు లేదా మీడియా రైట్ వింగ్ భావజాలం ఉన్నవారిని తరచుగా అవమానించడానికి ఉపయోగించే పదం. ఇటీవలే ఉత్తరప్రదేశ్ ముఖ్యమంత్రి యోగి ఆదిత్యనాథ్‌తో రజనీ సమావేశం అవడం, ఆయన పాదాలను తాకడం రజినీకి కొన్ని విమర్శలను తెచ్చిపెట్టింది. కేంద్రంలోని బీజేపీ నేతలతో రజనీకి ఉన్న స్నేహంతో పాటు ఆయన రాజకీయ వైఖరి కూడా చాలా మంది ఆయనను ప్రశ్నించడానికి దారితీసింది. ఎట్టకేలకు తన ఎమోషనల్ స్పీచ్ ద్వారా ఐశ్వర్య రజినీకాంత్ అన్ని విమర్శలను తిప్పి కొట్టారు.
లాల్ సలామ్ తమిళ వెర్షన్ ట్రైలర్ నిన్న రాత్రి విడుదల అయింది. కాగా ఈ సినిమా మత సామరస్యాన్ని ప్రోత్సహించడం చుట్టూ తిరుగుతుంది మరియు సున్నితమైన అంశాలను ప్రస్తావిస్తుంది. ‘లాల్ సలామ్’ ఒక ముఖ్యమైన సామాజిక సందేశంతో కూడిన ఆకట్టుకునే స్పోర్ట్స్ డ్రామా అని ట్రైలర్ సూచిస్తుంది. రజనీకాంత్ ఉన్న సన్నివేశాలు ఆయన అభిమానులను అలరించే విధంగా ఉన్నట్టే కనిపిస్తుంది.

లైకా ప్రొడక్షన్స్‌ పై సుభాస్కర అల్లిరాజా నిర్మించిన ఈ చిత్రంలో విష్ణు విశాల్, విక్రాంత్ ప్రధాన పాత్రలలో నటిస్తుండగా, రజనీకాంత్, విఘ్నేష్, లివింగ్‌స్టన్, సెంథిల్, జీవిత, కెఎస్ రవికుమార్ మరియు తంబి రామయ్య సహాయక పాత్రల్లో నటిస్తున్నారు. క్రికెట్ దిగ్గజం కపిల్ దేవ్ ఈ చిత్రంలో అతిధి పాత్రలో కనిపించనున్నారు. ప్రఖ్యాత స్వరకర్త ఏ ఆర్ రెహమాన్ మరియు ఎడిటర్ ప్రవీణ్ బాస్కర్ ఈ చిత్ర సాంకేతిక బృండంలో భాగంగా ఉన్నారు.