సినీ పరిశ్రమలో నిలదొక్కుకోవాలంటే ప్రతిభతో పాటు కాసింత అదృష్టం కూడా కలసిరావాలి. వచ్చిన ఛాన్సులను సరిగ్గా సద్వినియోగం చేసుకోవాలి. సినిమా సినిమాకు మరింత ఎఫర్ట్ పెడుతూ ఆడియెన్స్ మనసుల్ని దోచుకోవాలి. కాలం కలిసొస్తే స్టార్డమ్ వచ్చి, ఫ్యాన్ బేస్ ఏర్పడితే ఇక తిరుగుండదు. ఇలా ఒక్కో చిత్రంతో తమ అభిమాన గణాన్ని పెంచుకుంటూ, సక్సెస్లు కొడుతూ స్టార్లుగా మారిన వాళ్లను చూస్తూనే ఉన్నాం. అదే టైమ్లో ఒకట్రెండు హిట్స్తో ఓవర్నైట్ స్టార్లుగా మారి.. ఆ తర్వాత సరైన అవకాశాలు లేక రేసులో వెనుకబడి, కనుమరుగైన వాళ్లనూ చూస్తున్నాం.
‘ప్రేమదేశం’ సినిమాతో అప్పట్లో యూత్లో ఫుల్ పాపులారిటీ సంపాదించిన హీరో అబ్బాస్ ఇలాగే కనుమరుగయ్యారు. ఆ చిత్రంతో ఆయన ఓవర్నైట్ స్టార్ అయిపోయారు. అప్పట్లో అబ్బాస్ కటింగ్ కోసం సెలూన్ షాపుల ముందు యూత్ క్యూ కట్టేవారు. అయితే రొమాంటిక్ హీరోగా రాణిస్తాడనుకున్న అబ్బాస్ కెరీర్కు ఆ తర్వాత కొన్ని సినిమాలతోనే ఫుల్స్టాప్ పడిపోయింది. దీంతో చేసేదేమీ లేక కుటుంబం కోసం సహాయక పాత్రల్లో నటిస్తూ కెరీర్ను కొనసాగించారు. అలా అబ్బాస్ ఎక్కువ కాలం ఇండస్ట్రీలో నిలవలేదు. అనంతరం తన కుటుంబంతో కలసి న్యూజిలాండ్కు వెళ్లి అక్కడ కొత్త లైఫ్ను మొదలుపెట్టారు.
స్వదేశంలో స్టార్గా వెలుగొందిన అబ్బాస్.. విదేశాల్లో ఓ సాధారణ వ్యక్తిగా జీవించారు. అక్కడి పెట్రోల్ బంకుల్లో వర్క్ చేస్తూ, ట్యాక్సీలు నడుపుతూ బతికానని ఓ సందర్భంలో అబ్బాస్ బాహాటంగానే చెప్పారు. తాజాగా భారత్కు తిరిగొచ్చిన అబ్బాస్.. కోలీవుడ్ హీరోల గురించి చేసిన కామెంట్స్ అందరి దృష్టిని ఆకర్షిస్తున్నాయి. అజిత్తో పాటు విజయ్, సూర్య, విశాల్ గురించి ఆయన పలు వ్యాఖ్యలు చేశారు. దళపతి విజయ్ మృదుస్వభావి అని.. ఇప్పటికీ డౌన్ టు ఎర్త్గా ఉంటాడని అబ్బాస్ అన్నారు. ఆయన అతి చేయడని.. మంచి హాస్యం కలవాడని మెచ్చుకున్నారు. సినిమాల ఎంపిక విషయంలో హీరో సూర్య అద్భుతమని.. ఆయనకు పనిపై ఉన్న చిత్తశుద్ధి గురించి ఎంత చెప్పినా తక్కువేనన్నారు అబ్బాస్.
సెలబ్రిటీ క్రికెట్ లీగ్ విషయంలో విశాల్తో తనకు గొడవ జరిగిందని.. అయితే ఆయన్ను ఎప్పుడో క్షమించానన్నారు అబ్బాస్. ఇక, అజిత్ గురించి మాట్లాడుతూ.. ఆయనకు మంచి వ్యక్తిత్వం ఉందన్నారు అబ్బాస్. అజిత్ తన లాంటి వారేనన్నారు. అజిత్ ఏ విషయంపై అయినా మాట్లాడితే సూటిగా ప్రతిస్పందిస్తాడని అబ్బాస్ చెప్పుకొచ్చారు. ‘అజిత్ మూర్ఖత్వాన్ని అస్సలు సహించడు. ఏ హీరోలోనూ కనిపించని ఉత్సాహం ఆయనలో ఉంది. అజిత్కు ఇప్పటికే ఎన్నో సర్జరీలు జరిగాయి. పక్షవాతం వచ్చే ఛాన్స్ ఉందని డాక్టర్లు హెచ్చరించినా ఫ్యాన్స్ కోసం ఆయన సినిమాలు చేస్తున్నాడు. అభిమానుల మీద ఆయనకు ఎంతో అంకితభావం ఉంది. వాళ్ల ప్రేమే అజిత్ను ముందుకు నడిపిస్తోంది’ అని అబ్బాస్ చెప్పుకొచ్చారు.
