FD చేయాలనుకుంటున్నారా? అయితే మీకు గుడ్ న్యూస్.. వడ్డీ రేట్లు పెంచిన ప్రభుత్వ బ్యాంక్!

మీరు ఫిక్స్ డ్ డిపాజిట్ చేయాలని ప్లాన్ చేస్తున్నారా ? అయితే ప్రముఖ ప్రభుత్వ బ్యాంకుల్లో ఒకటైన పంజాబ్ అండ్ సింద్ బ్యాంక్ కీలక ప్రకటన చేసింది. ఫిక్స్‌డ్ డిపాజిట్లపై ఎంపిక చేసిన కొన్ని టెన్యూర్లపై వడ్డీ రేట్లను పెంచుతున్నట్లు ఆ బ్యాంక్ ప్రకటించింది. అలాగే లిమిటెడ్ పీరియడ్ ఆఫర్ కింద స్పెషల్ టెన్యూర్ ఫిక్స్‌డ్ డిపాజిట్లను కూడా ఈ బ్యాంక్ లాంఛ్ చేసింది. 2024, అక్టోబర్ 21 నుంచే ఈ నిర్ణయం అమల్లోకి వస్తుందని బ్యాంక్ ఇప్పటికే స్పష్టం చేసింది. వడ్డీ రేట్లపై మార్పులు చేసింది.. ఇక పంజాబ్ అండ్ సింద్ బ్యాంకులో ఇప్పుడు వడ్డీ రేట్లు.. కాలెబుల్ డిపాజిట్లపై సాధారణ ప్రజలకు 7 రోజుల నుంచి 10 సంవత్సరాల టెన్యూర్ డిపాజిట్లపై 4 శాతం నుంచి 7.45 శాతం దాకా ఉన్నాయి. నాన్ కాలెబుల్ డిపాజిట్లపై 555 రోజుల టెన్యూర్‌పై 7.50 శాతం వడ్డీని ఇవ్వనుంది ఈ బ్యాంక్. ఇక్కడ కాలెబుల్ డిపాజిట్లు అంటే.. మెచ్యూరిటీకి ముందు విత్‌డ్రా చేసుకునేందుకు ఛాన్స్ ఉండే డిపాజిట్లు. ఇక నాన్ కాలెబుల్ డిపాజిట్లు అంటే.. మెచ్యూరిటీకి ముందు విత్‌డ్రా చేసుకునేందుకు వీలు ఉండని డిపాజిట్లు.

సాధారణ ప్రజల కంటే సీనియర్ సిటిజెన్లకు ఎక్స్ ట్రాగా మరో 50 బేసిస్ పాయింట్ల వరకు వడ్డీ వస్తుంది. రూ. 3 కోట్ల కంటే తక్కువ చేసే రిటైల్ టర్మ్ డిపాజిట్లపై ఇది అప్లై అవుతుంది. వీరికి కాలెబుల్ డిపాజిట్లపై మినిమమ్ 4 శాతం నుంచి మాక్సిమం 7.95 శాతం దాకా వడ్డీ వస్తుంది. ఇక్కడ సీనియర్ సిటిజెన్లకు నాన్ కాలెబుల్ డిపాజిట్ లో 555 రోజుల టెన్యూర్ పై ఏకంగా 8 శాతం అందస్తోంది బ్యాంక్. సూపర్ సీనియర్ సిటిజెన్లకు అయితే బ్యాంక్ ఇంకా ఎక్కువ వడ్డీనే ఆఫర్ చేస్తోంది. వీరికి సీనియర్ సిటిజెన్ల కంటే మరో 0.15 శాతం వడ్డీ ఎక్కువగా ఇస్తుంది బ్యాంక్. 222 రోజులు, 333 రోజులు, 444 రోజులు, 555 రోజులు, 777 రోజులు, 999 రోజులు ఇలా స్పెషల్ డిపాజిట్లపై వడ్డీ వీరికి ఎక్కువగా ఉంటుంది.

ఇక 555 రోజుల నాన్ కాలెబుల్ డిపాజిట్‌పై వీరికి 8.15 శాతం వడ్డీ రేటు ఉంటుంది. కాలెబుల్ డిపాజిట్లపై అయితే 8.10 శాతం వడ్డీ వస్తుంది. ఈ స్పెషల్ టెన్యూర్ డిపాజిట్లలో ఇన్వెస్ట్ చేసేందుకు 2024, డిసెంబర్ 31 దాకా ఛాన్స్ ఉంది. ఒకవేళ 555 రోజుల డిపాజిట్‌పై రూ. 5 లక్షలు డిపాజిట్ చేస్తే.. సాధారణ ప్రజలకు 7.50 శాతం వడ్డీ రేటు లెక్కన రూ. 57,209 వడ్డీ వస్తుంది. సీనియర్ సిటిజెన్లకు 8 శాతం లెక్కన 5 లక్షలు ఫిక్సెడ్ డిపాజిట్ చేసినట్లయితే మెచ్యూరిటీ టైమ్ కి చేతికి రూ. 61,020 వడ్డీ వస్తుంది. ఇక సూపర్ సీనియర్ సిటిజెన్లకు అయితే 8.15 శాతం లెక్కన రూ. 62,166 వడ్డీ వడ్డీ వస్తుంది.