ఆఫ్ఘాన్ పేసర్ ఫారుకీ అరుదైన రికార్డు.. ఏం బౌలింగ్ వేశాడు భయ్యా!

టీ20 వరల్డ్ కప్-2024 సంచలనాలకు వేదికగా మారింది. మెగా టోర్నీ ఫస్ట్ డే నుంచి మ్యాచ్​లు ఆసక్తికరంగా సాగుతున్నాయి. తొలి రోజే నమీబియా-ఒమన్ మ్యాచ్ టై అయింది. ఇప్పుడు మరో సంచలన ప్రదర్శనకు వేదికగా నిలిచింది ప్రపంచ కప్. ఆఫ్ఘానిస్థాన్ పేసర్ ఫజల్​హక్ ఫారుకీ నిప్పులు చెరిగే బంతులతో మెగా టోర్నీకి మరింత ఊపు తీసుకొచ్చాడు. పసికూన ఉగాండాను వణికించాడతను. ఆ టీమ్​తో జరిగిన మ్యాచ్​లో సంచలన బౌలింగ్​తో చెలరేగిపోయాడు. 4 ఓవర్లు వేసిన ఫారుకీ.. కేవలం 9 పరుగులు మాత్రమే ఇచ్చి 5 వికెట్లు పడగొట్టాడు. ఉగాండాతో జరిగిన మ్యాచ్​లో ఆఫ్ఘానిస్థాన్ మొదట బ్యాటింగ్​కు దిగింది. 20 ఓవర్లలో 5 వికెట్ల నష్టానికి 183 పరుగులు చేసింది.

ఓపెనర్లు రెహ్మానుల్లా గుర్బాజ్ (76), ఇబ్రహీం జాద్రాన్ (70) చెలరేగి బ్యాటింగ్ చేశారు. తొలి వికెట్​కు 14.3 ఓవర్లలోనే ఏకంగా 154 పరుగులు జోడించారు. ఆ తర్వాత వచ్చిన వాళ్లు హిట్టింగ్​కు వెళ్లి త్వరగా ఔట్ అయ్యారు. అనంతరం ఛేజింగ్ మొదలుపెట్టిన ఉగాండా.. 16 ఓవర్లలో 58 పరుగులకే చాప చుట్టేసింది. ఆ జట్టు ఇన్నింగ్స్​లో ఒక్క రాబిన్సన్ ఒబుయా (14) తప్పితే ఎవ్వరూ రెండంకెల స్కోరు చేయలేదు. ఆఫ్ఘాన్ పేసర్ ఫారుకీ బుల్లెట్ పేస్​తో ప్రత్యర్థి బ్యాటర్లను భయపెట్టాడు. ఇద్దర్ని క్లీన్​బౌల్డ్ చేశాడు. అతడి దెబ్బకు క్రీజులో నిలబడేందుకు కూడా వాళ్లు వణికిపోయారు. ఫజల్​హక్​తో పాటు మ్యాంగో మ్యాన్ నవీనుల్ హక్, కెప్టెన్ రషీద్ ఖాన్ చెరో 2 వికెట్లతో సత్తా చాటారు. ఈ మ్యాచ్​తో ఫజల్​హక్ అరుదైన ఘనత సాధించాడు. పొట్టి కప్పు హిస్టరీలో ఆఫ్ఘాన్ తరఫున బెస్ట్ బౌలింగ్ ఫిగర్స్ నమోదు చేసిన బౌలర్​గా రికార్డ్ క్రియేట్ చేశాడు. అలాగే టీ20 ప్రపంచ కప్-2024లో 5 వికెట్లు తీసిన ఫస్ట్ బౌలర్​గానూ నిలిచాడు.

• ఇదీ చదవండి: వీడియో: గెటప్ మార్చి ఫ్యాన్స్​కు షాకిచ్చిన భారత స్టార్.. ఇతడ్ని గుర్తుపట్టండి చూద్దాం!

WHAT A SPELL, FAZALHAQ FAROOQI: 4-0-9-5 🚀

– Best bowling figures by an Afghanistan bowler in T20I World Cup history. pic.twitter.com/KCkpql9Ohk

— Johns. (@CricCrazyJohns) June 4, 2024