భారత్, పాకిస్థాన్ జట్లతో వర్షం ఆటాడుకుంటోంది. ఈ ఇరు జట్ల మధ్య జరిగే మ్యాచ్ కోసం ఎదురు చూస్తున్న ఫ్యాన్స్ ఆశలపై వరుణుడు నీళ్లు చల్లుతున్నాడు. ఆసియా కప్-2023లో భాగంగా ఈ ఇరు దాయాదుల మధ్య జరిగిన గ్రూప్ మ్యాచ్ వర్షం కారణంగా మధ్యలోనే నిలిచిపోయింది. వాన ఆటంకం కలిగించడంతో సూపర్-4 దశ మ్యాచ్ కూడా ఆగిపోయింది. అయితే రిజర్వ్ డే ఉండటంతో ఆదివారం మ్యాచ్ ఎక్కడ ఆగిందో, అక్కడి నుంచే సోమవారం నాడు కొనసాగించనున్నారు. మ్యాచ్లో భారత్ మంచి ఊపు మీదున్న సమయంలో వరుణుడు అడ్డు తగిలాడు. షాహిన్ షాతో పాటు ఇతర పాక్ బౌలర్ల బౌలింగ్లో చెలరేగి బ్యాటింగ్ చేశారు భారత ఓపెనర్లు శుబ్మన్ గిల్ (58), రోహిత్ శర్మ (56).
గిల్, రోహిత్ తక్కువ వ్యవధిలోనే పెవిలియన్కు చేరడంతో భారత్ కాస్త కష్టాల్లో పడ్డట్లు కనిపించింది. కానీ విరాట్ కోహ్లీ (8), కేఎల్ రాహుల్ (17) క్రీజులో నిలదొక్కుకున్నారు. ఈ సమయంలో వాన వల్ల ఆట నిలిచిపోయింది. ఆదివారం ఆడినట్లే పాజిటివ్ దృక్పథంతో పాక్ పేసర్లను భారత్ బ్యాట్స్మెన్ ఎదుర్కొంటే భారీ స్కోరును సాధించొచ్చు. ఆట ఆగిపోయే టైమ్కు టీమిండియా స్కోరు 147/2తో ఉంది. 280 రన్స్ వరకు చేస్తే మ్యాచ్ భారత్దేనని విశ్లేషకులు అంటున్నారు. అయితే మ్యాచ్ రిజర్వ్ డేకు వెళ్లడం అభిమానుల్ని కలవరపరుస్తోంది. ఎందుకంటే భారత్కు రిజర్వ్ డే పెద్దగా కలసిరాలేదు.
టీమిండియాకు రిజర్వ్ డే అంటే ఒక బ్యాడ్ సెంటిమెంట్ అనే చెప్పాలి. ఇలా రిజర్వ్ డే నాడు ఆడిన రెండు కీలకమైన మ్యాచుల్లో భారత్ ఓటమిపాలైంది. ఆ రెండు మ్యాచ్లు న్యూజిలాండ్తోనే ఆడినవి కావడం గమనార్హం. 2019 వన్డే వరల్డ్ కప్లో కివీస్తో సెమీఫైనల్లో తలపడింది టీమిండియా. ఆ మ్యాచ్లో తొలుత బ్యాటింగ్ చేసిన న్యూజిలాండ్ 239 రన్స్ చేసింది. విరాట్ కోహ్లీ సారథ్యంలోని టీమిండియా ఈ స్కోరును అలవోకగా ఛేదిస్తుందని అంతా అనుకున్నారు. కానీ భారత్ 49.3 ఓవర్లలో 221 రన్స్కు ఆలౌట్ అయింది. కీలక సమయంలో ఎంఎస్ ధోని రనౌట్ కావడంతో ఇండియాకు మ్యాచ్ చేజారింది. తను ఔట్ కాగానే ధోని కన్నీళ్లు పెట్టుకోవడంతో అప్పట్లో ఫ్యాన్స్ తట్టుకోలేకపోయారు. ధోని కెరీర్లో ఇదే ఆఖరి వన్డే కావడం గమనార్హం.
భారత్పై సెమీఫైనల్లో న్యూజిలాండ్ గెలిచినప్పటికీ తుది సమరంలో ఇంగ్లండ్ చేతుల్లో ఓడిపోయింది. దీన్ని పక్కనబెడితే.. టీమిండియాకు రిజర్వ్ డే నాడు మరో ఓటమి ఎదురైంది 2021లో. ఆ ఏడాది ప్రతిష్టాత్మక డబ్ల్యూటీసీ ఫైనల్లో న్యూజిలాండ్ చేతుల్లో ఓడిపోయి కప్ను చేజార్చుకుంది టీమిండియా. ఈ మ్యాచ్లో తొలి ఇన్నింగ్స్లో భారత్ 217 రన్స్కే కుప్పకూలింది. కివీస్ కూడా ఫస్ట్ ఇన్నింగ్స్లో 249కు అన్ని వికెట్లు కోల్పోయింది. అయితే రెండో ఇన్నింగ్స్లో భారత్ 170కు పరిమితమవ్వడంతో న్యూజిలాండ్ ముందు స్వల్ప లక్ష్యం నిలిచింది. 140 రన్స్ టార్గెట్ను కేవలం 2 వికెట్లు కోల్పోయి ఆడుతూ పాడుతూ ఛేదించింది కివీస్. రెండు కీలకమైన మ్యాచుల్లో రిజర్వ్ డే నాడు ఓడిన భారత్.. ఇవాళ పాక్తో జరగనున్న మ్యాచ్లోనూ అదే రిపీట్ చేస్తుందేమోనని ఫ్యాన్స్ ఆందోళన చెందుతున్నారు.
ఇదీ చదవండి: బుమ్రాకు షాహీన్ అఫ్రిది సర్ప్రైజ్ గిఫ్ట్!
