ప్రతిష్టాత్మకమైన ఆసియా కప్ టోర్నీకి అంతా సిద్ధమవుతోంది. ఈ టోర్నీ నిర్వహణపై ఎన్నో చర్చోపచర్చలు, వాదోపవాదాలు జరిగిన విషయం తెలిసిందే. భారత్, పాకిస్థాన్ క్రికెట్ బోర్డుల నడుమ గత ఏడెనిమిది నెలలుగా అలకలు, అవమానాలు, బెదిరింపులు, బహిష్కరణ హెచ్చరికలు నడిచాయి. ఎట్టకేలకు ఈ టోర్నీలో కీలక ఘట్టం ఆవిష్కృతమైంది. ఆసియా కప్-2023 షెడ్యూల్ వచ్చేసింది. ఆగస్టు 30 నుంచి సెప్టెంబర్ 17 వరకు జరగనున్న ఈ టోర్నీ షెడ్యూల్ను తాజాగా ప్రకటించారు. పాకిస్థాన్తో పాటు శ్రీలంక కూడా ఆతిథ్యం ఇస్తున్న ఈ మెగా టోర్నీకి కౌంట్డౌన్ మొదలైంది.
పాకిస్థాన్ వర్సెస్ నేపాల్ మధ్య ఆగస్టు 30వ తేదీన జరిగే ఫస్ట్ మ్యాచ్తో ఆసియా కప్కు తెరలేవనుంది. ఈ మ్యాచ్కు పాక్లోని ముల్తాన్ ఆతిథ్యం ఇవ్వనుంది. టోర్నీ మొత్తంలో ఫైనల్తో కలుపుకొని 13 మ్యాచ్లు జరగనున్నాయి. ఇందులో 4 మ్యాచ్లకు పాక్ ఆతిథ్యం ఇవ్వనుంది. సూపర్-4, ఫైనల్ సహా మిగిలిన అన్ని మ్యాచ్లు శ్రీలంకలోనే జరగనున్నాయి. ఈ ప్రతిష్టాత్మక టోర్నీలో భారత్ తన తొలి మ్యాచ్లో దాయాది పాకిస్థాన్తో తలపడనుంది. లంకలోని క్యాండీ వేదికగా సెప్టెంబర్ 2న జరిగే ఈ మ్యాచ్ టోర్నీలోనే హైలెట్గా నిలవనుంది. దీని కోసం ఇరు దేశాల క్రికెట్ అభిమానులు ఎంతగానో ఎదురు చూస్తున్నారు.
రౌండ్-1లో పాక్తో మ్యాచ్ తర్వాత నేపాల్తో భారత్ తలపడనుంది. రౌండ్-1 ఫలితాలను బట్టి సూపర్-4కు చేరుకునే టీమ్స్ ఏవో తేలుతుంది. సూపర్-4లో ఒక్కో జట్టు మిగిలిన టీమ్తో ఒక్కో మ్యాచ్లో ఆడుతుంది. ఇందులో టాప్-2లో నిలిచిన టీమ్స్ సెప్టెంబర్ 17న జరిగే ఫైనల్స్లో కప్ కోసం తలపడతాయి. ఒకవేళ భారత్, పాకిస్థాన్లు సూపర్-4తో పాటు ఫైనల్స్కు కూడా అర్హత సాధిస్తే ఇరు జట్ల మధ్య టోర్నీలో మూడు మ్యాచ్లు చూసే ఛాన్స్ ఫ్యాన్స్కు దొరుకుతుంది. ఇకపోతే, గత ఆసియా కప్ సూపర్-4లో పాక్ చేతిలో ఎదురైన పరాభవానికి బదులు తీర్చుకోవాలని భారత్ భావిస్తోంది. అదే టైమ్లో ఇండియాను మరోమారు ఓడించాలని దాయాది కలలు కంటోంది.
The full schedule of the Asia Cup 2023 🔥🏏
Mark your 🗓️#AsiaCup2023 #Insidesport #CricketTwitter pic.twitter.com/TCOXhYYCf8
— InsideSport (@InsideSportIND) July 19, 2023
