ఇప్పుడు ఎక్కడ చూసినా వరల్డ్ కప్ గురించే చర్చ. మరికొన్ని రోజుల్లో క్రికెట్లో అత్యంత ప్రతిష్టాత్మక టోర్నమెంట్కు తెరలేవనుంది. ఈసారి ప్రపంచ కప్కు భారత్ ఆతిథ్యం ఇస్తున్న విషయం విదితమే. కప్పు కొట్టాలని అన్ని జట్లు కృతనిశ్చయంతో ఉన్నాయి. సొంతగడ్డపై జరుగుతున్న టోర్నీలో విజేతగా నిలిచి కోట్లాది మంది భారతీయుల మనసుల్ని మరోమారు గెలుచుకోవాలని భారత క్రికెటర్లు భావిస్తున్నారు. 2011లో స్వదేశంలో జరిగిన వరల్డ్ కప్లో నెగ్గిన నేపథ్యంలో.. ఇప్పుడు కూడా అదే సెంటిమెంట్ను రిపీట్ చేయాలని అనుకుంటున్నారు. స్టార్ క్రికెటర్ విరాట్ కోహ్లీ ఈ టోర్నీలో సత్తా చాటాలని, అతడు బాగా ఆడితే కప్పు మనదేనని ఫ్యాన్స్ నమ్ముతున్నారు.
ఆసియా కప్లో రాణించిన కోహ్లీ.. అదే ఫామ్ను వరల్డ్ కప్లోనూ కొనసాగించాలని అభిమానులు కోరుకుంటున్నారు. ఈ తరుణంలో విరాట్ను ఉద్దేశించి సౌతాఫ్రికా మాజీ బ్యాటర్ ఏబీ డివిలియర్స్ ఇంట్రెస్టింగ్ కామెంట్స్ చేశాడు. ఈసారి ప్రపంచ కప్ను భారత్ గనుక సొంతం చేసుకుంటే కోహ్లీ వైట్బాల్ క్రికెట్కు గుడ్బై చెప్పే ఛాన్స్ ఉందని ఏబీడీ బాంబు పేల్చాడు. వన్డేలు, టీ20లకు రిటైర్మెంట్ ప్రకటించడానికి విరాట్కు ఇదే కరెక్ట్ టైమ్ అని డివిలియర్స్ అన్నాడు. 2027లో సౌతాఫ్రికాలో జరిగే వరల్డ్ కప్లో ఆడేందుకు కోహ్లీ ఇష్టపడతాడని తనకు తెలుసన్నాడు.
‘సౌతాఫ్రికా (2027 ప్రపంచ కప్ కోసం) రావడానికి కోహ్లీ ఇష్టపడతాడని నాకు తెలుసు. కానీ అదెంతో కష్టం. ఆ వరల్డ్ కప్కు ఇంకా చాలా సమయం ఉంది. ముందు ప్రస్తుత ప్రపంచ కప్పై దృష్టిపెడదాం. ఒకవేళ టీమిండియా ఈసారి కప్పు గెలిస్తే కోహ్లీ రిటైర్మెంట్ తీసుకునే ఛాన్స్ ఉంది. నేను టెస్టు క్రికెట్, ఐపీఎల్లో మాత్రమే ఆడతాను, నా కెరీర్ ఆఖరి రోజుల్ని ఎంజాయ్ చేస్తానని కోహ్లీ చెప్పొచ్చు. కానీ అతడు ప్రస్తుతం పూర్తి ఫిట్గా ఉన్నాడు. అతను ఎప్పటికప్పుడు రెస్ట్ తీసుకుంటున్నాడు. కాబట్టి మరికొన్నాళ్లు ఆడాలని కోహ్లీ భావించొచ్చు’ అని యూట్యూబ్ ఛానల్లో డివిలియర్స్ చెప్పుకొచ్చాడు.
ఇదీ చదవండి: ఆ రోజు పాంటింగ్ బ్యాట్లో స్ప్రింగులు!
