సూపర్ టెక్నాలజీతో అత్యధిక మైలేజీ ఇవ్వబోతోన్న Maruti Fronx!

ఆటోమొబైల్ మార్కెట్‌లో మారుతి సుజికి కార్లకి మంచి ప్రేక్షకాదరణ ఉంది. ముఖ్యంగా మధ్యతరగతి ప్రజలకు మారుతీ సుజుకి కార్లు ఓ వరం అని చెప్పాలి. ఇవి బడ్జెట్ ధరలో ఉంటాయి. పైగా సర్వీస్ సెంటర్లు కూడా ఎక్కువగా ఉంటాయి. అధిక మైలేజ్ ఇస్తాయి. ఈ మూడు అంశాలు వినియోగదారులను ఆకట్టుకుంటున్నాయి. అందుకే చాలా మంది ఈ కార్లని కొనడానికి ఇష్టపడుతున్నారు. అందుకే మారుతి సుజుకి కార్ల అమ్మకాలు ఎప్పుడు రికార్డు స్థాయిలో ఉంటాయి. ఇదిలా ఉండగా మారుతి కంపెనీ ఇప్పుడు హైబ్రిడ్ కార్లపై దృష్టి పెడుతోంది. అందుకే ప్రస్తుతం మారుతి సుజుకి హైబ్రిడ్ టెక్నాలజీతో రాబోతోంది. ఈ టెక్నాలజీతో SUV ఫ్రాంక్స్‌ మోడల్ ని విడుదల చేయడానికి రెడీ అవుతుంది. ఇది వచ్చే ఏడాది ప్రారంభించబడుతుందట. ఈ కార్ దేశంలోనే అత్యధిక మైలేజీని ఇచ్చే కారుగా నిలుస్తుందట. ఏకంగా 37 కిలోమీటర్ల మైలేజీని ఇస్తుందని సమాచారం తెలుస్తుంది.

ప్రస్తుతం మార్కెట్లో రన్ అవుతున్న మారుతి సుజుకి ఫ్రాంక్స్‌లో Z12E సిరీస్1.2 లీటర్ హైబ్రిడ్ ఇంజన్‌ ఉంటుంది. ఇది 3 సిలిండర్‌లను కలిగి ఉంటుంది.. ఈ కార్ 1.2L K-సిరీస్ అడ్వాన్స్‌డ్ డ్యూయల్ జెట్, డ్యూయల్ VVT పెట్రోల్ ఇంజన్, 1.0L పెట్రోల్ ఇంజన్‌ ఆప్షన్లో అందుబాటులో ఉంది. ఈ ఇంజన్ 5 స్పీడ్ మ్యాన్యువల్, 6 స్పీడ్ ఆటోమేటిక్ గేర్‌బాక్స్‌ కలిగి ఉంటుంది. ఇది స్టార్ట్ స్టాప్ టెక్నాలజీతో పని చేస్తుంది. ఈ కార్ CNG ఆప్షన్లో కూడా అందుబాటులో ఉంది. CNG మోడ్‌లో ఈ కార్ 28.51 కిలో మీటర్ల మైలేజీని ఇస్తుంది. ఈ కార్ పెట్రోల్ వెర్షన్ అయితే 22.89 కిలో మీటర్ల మైలేజీని ఇస్తుంది. ఈ కారులో స్పేస్ కూడా ఎక్కువగానే ఉంటుంది. అందువల్ల ఇందులో 5 మంది దాకా సౌకర్యంగా కూర్చోవచ్చు.

ఈ కారులో హెడ్‌అప్ డిస్‌ప్లే, టర్న్ బై టర్న్ నావిగేషన్, 360 డిగ్రీ కెమెరా, వైర్‌లెస్ స్మార్ట్‌ఫోన్ ఛార్జర్, 9 ఇంచెస్ HD స్మార్ట్ ప్లే ప్రో ప్లస్ ఇన్ఫోటైన్‌మెంట్ సిస్టమ్, వైర్డు ఆపిల్ కార్ ప్లే, ఆండ్రాయిడ్ ఆటో కనెక్టివిటీ వంటి ఫీచర్లు ఉన్నాయి. సేఫ్టీ కోసం ఈ కారులో యాంటీ-లాక్ బ్రేకింగ్ సిస్టమ్, 6 ఎయిర్ బ్యాగ్స్ వంటి ఫీచర్లు కూడా ఉన్నాయి. ఈ కార్ ఢిల్లీ ఎక్స్-షోరూమ్ ధర రూ.7.51 లక్షల నుండి రూ.13.04 లక్షల వరకు ఉంది. ఇక హైదరాబాద్ ఎక్స్-షోరూమ్ ధర అయితే 8.92 లక్షల నుంచి 15.95 లక్షల దాకా ఉంటుంది. అయితే ఈ కారు హైబ్రిడ్ టెక్నాలజీతో వచ్చినప్పుడు దీని ధర కాస్త ఎక్కువగానే ఉండే అవకాశం ఉంటుంది.