ఆసియా కప్-2023లో భాగంగా చిరకాల ప్రత్యర్థి పాకిస్థాన్తో జరిగిన సూపర్-4 మ్యాచ్లో భారత్ అద్భుత విజయాన్ని సాధించింది. దాయాదిపై అన్ని విభాగాల్లోనూ రాణించి వరల్డ్ కప్ ముంగిట తన సత్తా ఏంటో చాటింది. ఏకంగా 228 రన్స్ తేడాతో ప్రత్యర్థిని చిత్తు చేసింది. ఈ మ్యాచ్లో భారత ఓపెనర్లు రోహిత్ శర్మ (56), శుబ్మన్ గిల్ (58)తో పాటు కింగ్ కోహ్లీ, కేఎల్ రాహుల్ పాక్ బౌలర్లను ఊచకోత కోశారు. రోహిత్, గిల్ హాఫ్ సెంచరీలతో ఇన్నింగ్స్కు మంచి పునాది వేయగా.. కోహ్లీ (122 నాటౌట్), రాహుల్ (111 నాటౌట్) సెంచరీలతో కదం తొక్కి టీమిండియాకు భారీ స్కోరును అందించారు. భారత ఇన్నింగ్స్లో విరాట్ కోహ్లీ బ్యాటింగ్ స్పెషల్ అనే చెప్పాలి.
హాఫ్ సెంచరీ వరకు నెమ్మదిగా ఆడిన విరాట్.. ఆ తర్వాత జూలు విదిల్చాడు. ఈ సెంచరీతో వన్డేల్లో కోహ్లీ శతకాల సంఖ్య 47కు చేరింది. సచిన్ పేరు మీద ఉన్న అత్యధిక శతకాల రికార్డు (49)కు విరాట్ మరింత చేరువయ్యాడు. ఇది కొలంబో స్టేడియంలో కోహ్లీకి వరుసగా నాలుగో ఇంటర్నేషనల్ సెంచరీ కావడం గమనార్హం. పాక్తో మ్యాచ్ సమయంలో బ్యాటింగ్ చేస్తున్నప్పుడు తన మైండ్లో ఒకే విషయం ఉందన్నాడు కోహ్లీ. మంగళవారం నాడు శ్రీలంకతో మ్యాచ్ జరగాల్సి ఉందని.. దాని గురించే తాను ఆలోచిస్తూ ఉన్నానని విరాట్ తెలిపాడు. తాను టీమ్కు సాయపడేందుకు ఎల్లప్పుడూ అన్ని విధాలుగా సిద్ధంగా ఉంటానన్నాడు.
‘కేఎల్ రాహుల్ ఇవాళ గొప్ప ఆరంభాన్ని ఇచ్చాడు. కేవలం స్రైక్ రొటేట్ చేయడమే నా పని. రన్స్ ఈజీగా రాబట్టడం సంతోషంగా ఉంది. నేను కొట్టిన రివర్స్ ర్యాంప్ షాట్పై నాకు గౌరవం ఉంది. సెంచరీ దాటిన తర్వాత ఆ షాట్ కొట్టా. రాహుల్తో నా భాగస్వామ్యం గొప్పది. ఇది భారత్కు మంచి సంకేతం. ఈ విధంగా అతడు వన్డేల్లో రీఎంట్రీ ఇవ్వడం ఎంతో ఆనందం కలిగించే విషయం. ఇక, మంగళవారం మధ్యాహ్నం 3 గంటలకు మేం మరో మ్యాచ్ ఆడాల్సి ఉంది. అదృష్టవశాత్తు మేం టెస్టు ఆటగాళ్లం. వందకు పైగా టెస్టులు ఆడా. కాబట్టి మరుసటి రోజు తిరిగి వచ్చి ఎలా ఆడామో మాకు తెలుసు’ అని కోహ్లీ చెప్పుకొచ్చాడు.
ఇదీ చదవండి: ఓటమి బాధలో ఉన్న పాక్కు మరో షాక్!
