ఆసియా కప్-2023లో భారత్ బోణీ కొట్టొంది. దాయాది పాకిస్థాన్తో జరిగిన తొలి మ్యాచ్ వరుణుడి వల్ల రద్దయిన విషయం తెలిసిందే. నేపాల్తో రోహిత్ సేన ఆడిన తర్వాతి మ్యాచ్ను వర్షం విడిచిపెట్టలేదు. ఆటకు పలుమార్లు అంతరాయం కలిగించింది. అయితే మ్యాచ్లో ఫలితం మాత్రం వచ్చింది. డక్వర్త్ లూయిస్ పద్ధతిలో టార్గెట్ను 23 ఓవర్లలో 145గా నిర్ణయించగా.. టీమిండియా 20.1 ఓవర్లలో వికెట్ నష్టపోకుండా ఛేజ్ చేసి ఘనవిజయాన్ని అందుకుంది. భారత ఓపెనర్లు రోహిత్ శర్మ (74 నాటౌట్), శుబ్మన్ గిల్ (67 నాటౌట్) అదరగొట్టారు. నేపాల్ ఇన్నింగ్స్లో ఓపెనర్లు ఆసిఫ్ షేక్ (58), కుశాల్ బుర్టేల్ (38), సోంపాల్ కామి (48)ల పోరాటపటిమ అందర్నీ ఆకట్టుకుంది.
నేపాల్పై హాఫ్ సెంచరీతో అదరగొట్టిన భారత సారథి రోహిత్ శర్మకు మ్యాన్ ఆఫ్ ది మ్యాచ్ అవార్డు లభించింది. ఈ విజయంతో సూపర్-4 దశకు చేరుకున్న భారత్.. సెప్టెంబర్ 10న పాకిస్థాన్తో మరోసారి తలపడనుంది. ఇప్పుడు ఫోకస్ అంతా వన్డే వరల్డ్ కప్ కోసం ఇవాళ ప్రకటించే జట్టు పైనే ఉంది. ఈ నేపథ్యంలో నేపాల్తో మ్యాచ్ తర్వాత రోహిత్ శర్మ ఆసక్తికర వ్యాఖ్యలు చేశాడు. ఆసియా కప్కు వచ్చేటప్పటికే ప్రపంచ కప్ జట్టు ఎలా ఉండాలో ఒక అంచనాకు వచ్చామని తెలిపాడు. ప్రస్తుత టీమ్లో నుంచే ఒకరిద్దర్ని పక్కన పెట్టే ఛాన్స్ ఉందని హిట్మ్యాన్ చెప్పుకొచ్చాడు.
‘వరల్డ్ కప్ కోసం బరిలోకి దిగే జట్టుపై ఇప్పటికే ఒక అంచనాతో ఉన్నాం. ఇప్పుడు ఉన్న టీమ్లో నుంచి ఒకరిద్దర్ని పక్కన పెట్టే అవకాశం ఉంది. రెండో మ్యాచ్లో మేం బౌలింగ్లో పూర్తిస్థాయిలో ఓవర్లు సంధించాం. ఇరు మ్యాచుల్లోనూ అత్యుత్తమ ఆటతీరును ప్రదర్శించలేకపోయాం. కొందరు ప్లేయర్లు చాన్నాళ్ల తర్వాత మైదానంలోకి వచ్చారు. లీగ్ దశలో పాకిస్థాన్తో మ్యాచ్లో టాపార్డర్ ఒత్తిడికి గురైనప్పటికీ హార్దిక్ పాండ్యా, ఇషాన్ కిషన్ ఆదుకున్నారు. నేపాల్తో మ్యాచ్లో మా బౌలింగ్ ఫర్వాలేదు. కానీ ఫీల్డింగ్ నాసిరకంగా ఉంది. మా తప్పుల్ని మెరుగుపర్చుకొని సూపర్-4లో బరిలోకి దిగుతాం’ అని రోహిత్ శర్మ వ్యాఖ్యానించాడు.
ఇదీ చదవండి: ఫుట్బాల్ లెజెండ్ రొనాల్డోకు లై డిటెక్టర్ టెస్ట్!
