క్రికెట్లో ప్రస్తుత తరం ఆటగాళ్లలో అత్యుత్తమం ఎవరంటే.. ఠక్కన వినిపించే పేరు విరాట్ కోహ్లీ. ప్రస్తుత తరం అనే కాదు క్రికెట్ హిస్టరీలో ఆల్టైమ్ గ్రేటెస్ట్ ప్లేయర్లలో కోహ్లీ ఒకడని చెప్పడంలో ఎలాంటి అతిశయోక్తి లేదు. 22 గజాల పిచ్పై అతడు సాధించిన పరుగుల ప్రవాహం.. ఏళ్ల తరబడి నిలకడగా రాణించడం, పాత రికార్డులను తుడిపేయడం, అసాధ్యమనుకున్న ఎన్నో కొత్త రికార్డులను సృష్టించిన కోహ్లీని ఈ జనరేషన్లో బెస్ట్ క్రికెటర్గా చెప్పుకోవచ్చు. అందుకే కోహ్లీకి ప్రపంచవ్యాప్తంగా ఎంతో పాపులారిటీ ఉంది. క్రికెట్ అంటే తెలియని ఎంతో మందికి విరాట్ తెలుసంటేనే.. అతడి క్రేజ్ ఏ స్థాయిలో ఉందో అర్థం చేసుకోవచ్చు.
అభిమానులతో పాటు తన తోటి క్రికెటర్లకు విరాట్ కోహ్లీ అంటే చాలా ఇష్టం. దాయాది దేశం పాకిస్థాన్ కెప్టెన్ బాబర్ ఆజం కూడా రన్ మెషీన్ను ఇష్టపడేవారిలో ఒకడు. అందుకే సందర్భం వచ్చినప్పుడల్లా విరాట్పై ప్రశంసల జల్లులు కురిపిస్తాడు బాబర్. ఆసియా కప్లో భారత్తో తలపడేందుకు ముందు కోహ్లీని మరోమారు మెచ్చుకున్నాడతను. టీమిండియా స్టార్ బ్యాట్స్మన్ నుంచి తాను చాలా నేర్చుకున్నానని అన్నాడు బాబర్. విరాట్ కొన్ని సందర్భాల్లో తన గురించి సానుకూలంగా స్పందించాడని.. అది తనలో ఎనలేని ఆత్మవిశ్వాసాన్ని నింపిందన్నాడు. 2019లో తొలిసారి కోహ్లీని కలిశానని.. ఆ సమయంలో అతడి కెరీర్ ఎంత ఉన్నతస్థాయిలో ఉందో, ఇప్పుడు కూడా అలాగే ఉందన్నాడు.
విరాట్ కోహ్లీ మాదిరిగా ఇన్నేళ్ల పాటు నిలకడగా ఆడటం అనేది అంత ఈజీ కాదన్నాడు బాబర్ ఆజం. ఇదో అద్భుతమని చెప్పుకొచ్చాడు. బ్యాటింగ్ మీద తనకు ఉన్న సందేహాలు, టెక్నిక్స్ గురించి అడిగితే కోహ్లీ ఎంతో ఓపికగా బదులిచ్చాడని బాబర్ ఆజం పేర్కొన్నాడు. కోహ్లీ ఇచ్చిన టిప్స్ తనకు ఎంతగానో ఉపయోగపడ్డాయని తెలిపాడు. కాగా, భారత్తో మ్యాచ్కు ముందు పాకిస్థాన్ అదరగొట్టింది. పసికూన నేపాల్పై ఏకంగా 238 రన్స్ తేడాతో గెలిచింది. ఈ మ్యాచ్లో సెంచరీతో అదరగొట్టిన బాబర్ ఆజం ప్లేయర్ ఆఫ్ ది మ్యాచ్ పురస్కారాన్ని అందుకున్నాడు. ఈ గెలుపుతో టీమిండియాను ఎదుర్కొనేందుకు దాయాది జట్టు సమాయత్తమవుతోంది.
