టాలీవుడ్ లో పలు విజయవంతమైన చిత్రాలు నిర్మించి సక్సెస్ ఫుల్ నిర్మాతగా పేరుతెచ్చుకున్న ఎంఎస్ రాజుకు ఈమధ్య హిట్లు లేవు. తనయుడు సుమంత్ అశ్విన్ ను హీరోగా నిలబెట్టే ప్రయత్నాలు కూడా సఫలం కాలేదు. అయితే చాలాకాలం తర్వాత ఆయన ఓ సినిమాతో ప్రేక్షకుల ముందుకు రానున్నారు. సినిమా పేరు ‘డర్టీ హరి’.
ఈ సినిమాను ఎంఎస్ రాజు గారు నిర్మించడం లేదు కానీ దర్శకత్వం వహిస్తున్నారు. పేరుకు తగ్గట్టే ఈ సినిమా ఓ బోల్డ్ సినిమా. ఈమధ్య కాలంలో ఇలాంటి సినిమాలకు డిమాండ్ పెరిగిన సంగతి తెలిసిందే. దీంతో ఆయన యూత్ ను టార్గెట్ చేస్తూ హిట్ బాట పట్టాలనే ప్రయత్నాలలో ఉన్నారని టాక్ వినిపిస్తోంది. ఈ సినిమాను నిజానికి థియేటర్లలో విడుదల చేయాలని మొదట అనుకున్నారట కానీ థియేటర్లు అందుబాటులో లేకపోవడం, ఈ తరహా కాన్సెప్టులకు ఓటీటీలో ఆదరణ ఎక్కువగా ఉండడంతో డైరెక్ట్ ఓటీటీ రిలీజ్ చేయాలని డిసైడ్ అయ్యారట.
‘చి.ల.సౌ’ ఫేమ్ రుహాని శర్మ హీరోయిన్ గా, శ్రవణ్ రెడ్డి హీరోగా నటించిన ఈ సినిమాను ప్రస్తుతం పోస్ట్ ప్రొడక్షన్ జరుపుకుంటోందట. త్వరలోనే ఈ సినిమా ఓటీటీ రిలీజుకు సంబంధించిన ప్రకటన రానుందని సమాచారం. మరి ఈ సినిమాతో ఎంఎస్ రాజు గారు దర్శకుడిగా తన సత్తా చాటుతారా అనేది వేచి చూడాలి.
