ఏలియన్స్‌కు గుడి కట్టి పూజలు! ఆ కష్టం నుండి కాపాడమని!

సాధారణంగా దేవతలకు, దేవుళ్లకు దేవాలయాలు నిర్మించి పూజించుకుంటూ ఉంటాం. అలాగే విగ్రహాల ప్రతిష్టాపన చేసి స్మరించుకుంటాం. కోర్కెలు తీర్చాలంటూ విన్నవించుకుంటూ ఉంటారు. అయితే ఈ మధ్యకాలంలో తమను విడిచి వెళ్లిపోయిన వ్యక్తుల కోసం కూడా గుడి నిర్మించడాన్ని చూస్తున్నాం. మరణించిన భార్య కోసం భర్త, తనను ప్రాణంగా చూసుకున్న భర్త ఇక లేడని జీర్ణించుకోలేకపోయిన భార్య.. భర్తను స్మరించుకునేందుకు గుడి నిర్మిస్తున్న ఘటనలు ఈ మధ్య కాలంలో చోటుచేసుకున్నాయి. అంతేనా అభిమాన నటీనటులకు కూడా గుడులు కట్టి పూజించుకుంటున్నారు ఫ్యాన్స్. కుష్బు, హన్సిక, సమంతలాంటి స్టార్ హీరోయిన్లకు గుడి కట్టిన దాఖలాలున్నాయి. అయితే మనిషి, దేవుడికి కాకుండా ఓ వింత జీవికి గుడి కట్టి పూజిస్తున్నాడు ఓ వ్యక్తి.

గ్రహంతర వాసుల కోసం గుడి కట్టి పూజిస్తున్నాడో వ్యక్తి. ఇప్పటి వరకు ఊహాతీతంగా అలాగే సైంటిఫికల్‌గా నిరూపితం కానీ ఏలియన్స్ కోసం దేవాలయాన్ని నిర్మించడమే కాకుండా పూజలు చేస్తున్నాడు. వినడానికి వింతగా ఉన్న ఈ గుడి తమిళనాడులోని సేలంలో ఉంది. మల్లముపంబట్టికి చెందిన లోగనాథన్.. ఏలియన్స్ కోసం తన వ్యవసాయ భూమిలో గుడిని ఏర్పాటు చేయడంతో పాటు ఏకంగా గ్రహంతర దేవుడ్ని ప్రతిష్టాపించాడు. ఈ వార్త రాష్ట్ర వ్యాప్తంగా దావనంలా వ్యాపించింది. గ్రహాంతర దేవుడితో పాటు.. సెల్లార్‌లో శివుడు, పార్వతి, మురుగన్, కాళి వంటి దేవతల విగ్రహాలను కూడా ప్రతిష్టాపించి నిత్యం పూజలు నిర్వహిస్తున్నాడు. ఈ గుడిని నిర్మించడానికి అతడు అనుమతులు కూడా తీసుకోవడం గమనార్హం.

ఇంతకు అతడు ఆ గుడి నిర్మించడానికి కారణాలేంటో తెలుసా..? ప్రపంచంలో ప్రకృతి వైపరీత్యాలు పెరిగిపోతుండటంతో వాటిని అడ్డుకునే శక్తి గ్రహాంతర వాసులకు ఉందని నమ్ముతున్న లోగనాథన్ ఏలియన్ గుడిని నిర్మించాడు. ప్రజలను కాపాడే శక్తి గ్రహాంతర దేవుడికి ఉందని అంటున్న అతడు.. ఈ విగ్రహం ఏలియన్స్‌తో మాట్లాడుతుందని చెబుతున్నాడు. గ్రహాంతర వాసులకు ఈ దేవుడు సమాచారాన్ని చేరవేస్తున్నాడని అంటున్నాడు. అలాగే గ్రహాంతర వాసుల నుండి వచ్చే రేడియేషన్ నుండి తప్పించుకోవడానికి అరిటాకు శరీరానికి చుట్టుకోవాలంటూ అశ్రాస్తీయమైన వాదనలు చేస్తున్నాడు. ఇంకా అక్కడ ఈ గుడి నిర్మాణ పనులు కొనసాగుతున్నాయి.  ఈ గుడి గురించి స్థానికంగా చర్చనీయాంశం కావడంతో పెద్ద సంఖ్యలో తిలకించేందుకు వస్తుండటం విశేషం. అయితే ఇప్పటి వరకు ఏలియన్స్ ఉన్నాయన్న బలమైన వాదన లేదు. దీనిపై పరిశోధనలు జరుగుతున్న సంగతి విదితమే.