నేను గర్భవతిని.. దర్శన్ నా భర్తను చంపేశాడు! రేణుకా స్వామి భార్య కన్నీరు!

రేణుకా స్వామి అనే వ్యక్తిని హత్య చేసిన కేసులో కన్నడ టాప్ హీరో, ఛాలెంజింగ్ స్టార్ దర్శన్, అతడి ప్రియురాలు పవిత్ర గౌడలతో సహా 13 మందిని బెంగళూరు పోలీసులు అరెస్టు చేశారు. రేణుకా స్వామి చిత్రదుర్గ దర్శన్ ఫ్యాన్ అసోసియేషన్ అధ్యక్షుడు. ఈ నెల 1న ఇంటి నుండి బయటకు వెళ్లిన రేణు స్వామి.. జూన్ 9వ తేదీన శవమై కనిపించాడు. స్థానికులు చూసి పోలీసులకు సమాచారం ఇవ్వడంతో తీగ లాగితే డొంక కదిలినట్లుగా.. ఈ హత్యకు పాల్పడిన వారిని అదుపులోకి తీసుకుని విచారించగా..దర్శన్ సూచనల మేరకు అతడ్ని హత్య చేసినట్లు చెప్పడంతో హీరోను అరెస్టు చేశారు. ప్రియురాలు పవిత్ర గౌడకు అసభ్యకరమైన సందేశాలు పంపడంతో తట్టుకోలేకపోయిన దర్శన్.. అతడ్ని బెంగళూరుకు పిలిపించి..కామాక్షిపాళ్యంలోని తన స్నేహితుడి గోడౌన్ షెడ్డులో దాచి కొట్టడంతో అతడు చనిపోయాడు.

అనంతరం మృతదేహాన్ని కారులో తీసుకెళ్లి కాలువలో పడేశారు. పోలీసులు ఈ కేసు టేకప్ చేయగా.. దర్శన్, ప్రియురాలు పేర్లు వినిపించాయి. వెంటనే ఒక్కొక్కరిని అదుపులోకి తీసుకున్నారు. ఈ కేసులో దర్శన్‌ను ఆరు రోజుల పాటు పోలీసు కస్టడీకి తరలించారు. కాగా, రేణుక స్వామి భార్య సహానా మీడియా ముందు కన్నీరుమున్నీరు అవుతుంది. తాను గర్భవతినని, తనకు న్యాయం చేయాలని వేడుకుంది. ‘మాకు ఓ సంవత్సరం క్రితం పెళ్లైంది. ఇప్పుడు నేను మూడు నెలల గర్భవతిని, నా భర్త హత్యకు గురయ్యాడు. నా బిడ్డ భవిష్యత్ ఏంటీ. ఇప్పుడు నేనేలా బతకాలి’ అంటూ ప్రశ్నించింది. తన భర్త రేణుకా స్వామి.. దర్శన్ ప్రియురాలు పవిత్ర గౌడకు కించపరిచే సందేశాలు పంపలేదని భార్య చెబుతుంది. జూన్ 8 మధ్యాహ్నం తన భర్త ఫోన్ చేసి.. డిన్నర్‌కి వస్తానని చెప్పాడు కానీ రాలేదని కన్నీరు పెట్టుకుంది.

‘నా భర్త సోషల్ మీడియాలో కించపరిచే సందేశాలు పంపితే.. అతనికి వార్నింగ్ ఇవ్వాలి కానీ.. చంపాల్సిన అవసరం ఏమొచ్చింది? నటుడైనా సరై.. స్టార్ అయినా నాకు న్యాయం కావాలి’ అని కోరింది. ఇప్పుడు తన భర్తను ఎవరు తిరిగి తీసుకువస్తారూ అంటూ కన్నీరు పెట్టుకుంది. ఇదిలా ఉంటే కొంత మంది రాజకీయ నేతల అండతో దర్శన్‌ను రక్షించేందుకు ప్రయత్నాలు జరుగుతున్నాయని తెలుస్తుంది. ఇదిలా ఉంటే.. పోలీసుల విచారణలో .. అతడికి జస్ట్ వార్నింగ్ మాత్రమే ఇమ్మన్నానని, చంపమని చెప్పలేదని దర్శన్ వెల్లడించాడు. కానీ రేణుకా స్వామిని కొంత మంది కలిసి కొడుతున్న సమయంలో దర్శన్ కూడా అక్కడే ఉన్నట్లు తెలుస్తుంది. మెల్లిగా దర్శన్ మెడకు ఉచ్చు బిగుస్తున్నట్లు సమాచారం.