రెండు రోజుల్లో ఓం భీమ్ బుష్ ఎంత కలెక్ట్‌ చేసిందంటే

ఈ వారం ప్రేక్షకుల ముందుకు వచ్చిన సరికొత్త సాలిడ్ ఎంటర్‌టైనర్ ఓం భీమ్ బుష్. శ్రీవిష్ణు, ప్రియదర్శితో పాటు రాహుల్ రామకృష్ణ ప్రధాన పాత్రల్లో నటించిన ఈ చిత్రానికి హర్ష కొనుగంటి దర్శకత్వం వహించారు. నో లాజిక్ ఓన్లీ మ్యాజిక్ అంటూ ప్రధానంగా కామెడీ సినిమాగా తెరకెక్కిన ఓం భీమ్ బుష్ లో ఎవరూ టచ్ చేయటానికి సాహసించని కాన్సెప్ట్ కూడా ఉంది. ప్రేక్షకుల నుంచి పాజిటివ్ రెస్పాన్స్ అందుకున్న ఈ ఎంటర్‌టైనర్ బాక్సాఫీస్ వద్ద కూడా జోరు అందుకుంది.

మొదటి నుండి ఇంట్రెస్టింగ్ ప్రమోషన్స్ తో ఆకట్టుకున్న ఈ సినిమా మార్చి 22న విడుదలై అంచనాలను అందుకొని టికెట్ కౌంటర్ల వద్ద సాలిడ్ వసూళ్లను నమోదు చేసింది. ఈ చిత్రం విడుదలైన మొదటి రోజున 4 కోట్ల పైగా గ్రాస్ వసూలు చేసిన ఓం భీమ్ బుష్ రెండవ రోజు మరింత ఊపందుకుంది. రెండవ రోజు 6 కోట్ల గ్రాస్ వసూలు చేసిన ఈ సినిమా మొత్తంగా రెండు రోజుల్లో ప్రపంచ వ్యాప్తంగా 10.44 కోట్ల గ్రాస్ వసూలు చేసింది. ఇక ఈరోజు ఆదివారం అవడంతో పాటు రేపు హోలీ పండగ సెలవుని కూడా ఉపయోగించుకుని మరిన్ని కలెక్షన్లు రాబడుతుందని ట్రేడ్ పండితులు అంటున్నారు.

సన్నీ ఎంఆర్ ఈ చిత్రానికి సంగీతం అందించగా, వి సెల్యులాయిడ్ తో పాటు యువి క్రియేషన్స్ బ్యానర్ ఈ చిత్రాన్ని నిర్మించింది. బ్యాంగ్ బ్రోస్ అనే పేరుతో భైరవపురంలో మోసాలు చేస్తూ డబ్బులు సంపాదించే ముగ్గురు యువకుల కథగా ఓం భీమ్ బుష్ తెరకెక్కింది. మొదటి నుంచీ ఈ సినిమాలో కామెడీ తప్ప పెద్దగా కథ ఏమీ ఉండదని చిత్ర బృందం చెప్తూ వచ్చింది. అయితే విడుదలకు ముందు సినిమాకి సంభందించిన ఒక ఎమోషనల్ లైన్ బయటకి రాకుండా చూసుకున్నారు. సెకండాఫ్ లో వచ్చే ఆ ఎమోషనల్ టచ్ సినిమాని ప్రేక్షకులకి మరింత దగ్గరయ్యేలా చేసింది. సామజవరగమన సినిమాతో ఇటీవలే భారీ హిట్ అందుకున్న హీరో శ్రీ విష్ణు కెరీర్ లో మరో సూపర్ హిట్ గా నిలిచే దిశగా దూసుకుపోతోంది ఓం భీమ్ బుష్.