సమాజంలో కొత్త ట్రెండ్! ఫ్రెండ్‌షిప్ మ్యారేజ్‌ చేసుకుంటున్న యువతీయువకులు!

‘కొత్త ఒక వింత- పాత ఒక రోత’ అన్నారు పెద్దలు. కాలం మారినప్పుడు, ప్రపంచం కొత్త పుంతలు తొక్కుతున్నప్పుడు ఈ సామెత సరిగ్గా సరిపోతుంది. ఇది వివాహ బంధానికి కూడా వర్తిస్తుంది. ఒకప్పుడు ఈడు వచ్చిన అబ్బాయిలు, అమ్మాయిలకు కుటుంబ పెద్దలు పెళ్లిళ్లు చేసేవారు. ఆ తర్వాత కాలంలో లవ్ మ్యారేజెస్ వచ్చాయి. ఆ తర్వాత మ్యారేజ్ వద్దు.. లివింగ్ రిలేషన్ ముద్దు అని కొత్త రాగం అందుకున్నారు. ఇష్టమొచ్చినంత కాలం ఎలాంటి కమిట్మెంట్స్ లేకుండా అమ్మాయి, అబ్బాయి ఒకే ఇంట్లో ఉంటూ సహజీవనం చేస్తున్నారు. ఇందులో సెక్స్ కూడా ఓ పార్ట్. ఈ మధ్య కాలంలో లెస్బియన్స్, గేలు పెళ్లి చేసుకుంటున్నారు. ఇప్పుడు మరో నయా ట్రెండ్ పుట్టుకు వచ్చింది. అదే ఫ్రెండ్ షిప్ మ్యారేజ్.

జపాన్ దేశంలో విపరీతమైన ప్రజాదరణ పొందుతోంది ఈ ఫ్రెండ్ షిప్ మ్యారేజ్. సౌత్ చైనా మార్నింగ్ పోస్ట్ ఇచ్చిన కథనం ప్రకారం.. ఇందులో సెక్స్, ప్రేమ ఏమీ ఉండవు. కేవలం స్నేహా పూర్వక సంబంధం మాత్రమే ఉంటుంది. 124 మిలియన్స్ జనాభా ఉన్న జపాన్‌లో 1 శాతం మంది యువత.. దీని వైపు మొగ్గు చూపుతున్నారు. లైంగిక సంబంధాలను ఇష్టపడనివారు, స్వలింగ సంపర్క వివాహాలు, సాంపద్రాయ వివాహాల పట్ల అనాసక్తి చూపుతున్న వారంతా.. దీనికి ఆకర్షితులవుతున్నారు. కలర్స్ అనే ఏజెన్సీ సేకరించిన డేటా ప్రకారం.. 2015లో మొదలైంది ఈ ప్రక్రియ. ఇప్పటి వరకు 500 మంది ఈ ఫ్రెండ్ షిప్ మ్యారేజ్ చేసుకున్నారు. కాపురాన్ని కూడా స్టార్ చేస్తున్నారు. ఈ రిలేషన్‌లో ఫిజికల్ రిలేషన్ షిప్ ఉండని నేపథ్యంలో పిల్లలు ఎలా అనుకోవచ్చు. ఈ దంపతులు పిల్లల్ని పెంచుకునే అవకాశం ఉంది.

ఇంతకు ఈ ఫ్రెండ్ షిఫ్ మ్యారేజ్ అంటే ఏమిటంటే..చట్టపరంగా పెళ్లి చేసుకుంటారు కానీ.. ప్రేమా, గీమా జాన్తానయ్. కలిసైనా ఉండొచ్చు.. విడిగా కూడా జీవించొచ్చు. కృత్రిమ గర్భదారణ ద్వారా కూడా పిల్లల్ని కనాలని నిర్ణయించుకోవచ్చు. ఈ మ్యారేజ్ చేసుకున్న వారు.. పరస్పర అంగీకారంతో వేరే వ్యక్తులతో సెక్స్,రిలేషన్ లో ఉండేందుకు అవకాశం కూడా ఉంటుంది. ఈ ఫ్రెండ్ షిప్ మ్యారేజ్ అంటే ఓ పెళ్లి అనే రిలేషన్‌లా కాకుండా రూమ్మేట్స్ లా జీవించడమని.. దీన్ని ఫాలో అవుతున్నవ్యక్తి వెల్లడించారు. కాగా, ఈ మ్యారేజ్ చేసుకున్న 80 శాతం మంది జంటలు చాలా సంతోషంగా ఉన్నట్లు కలర్స్ ఏజెన్సీ వెల్లడించింది. సగటున 32 ఏళ్లు ఉన్న జపాన్ యువత ఇలాంటి వివాహాలను ఇష్టపడుతున్నట్లు తెలిపింది. ఈ రకమైన సంబంధాలు వద్దు అనుకుంటే.. విడిపోవచ్చు. పాలసీ నిబంధనల ప్రకారం ముందుకు సాగవచ్చు. ఇది చదివాక.. మనకు ఇలాంటిది వస్తే బాగుణ్ణు అనిపిస్తుంది కదా