నిర్మాతలకు రిలీజ్ డేట్లు లాక్ చేసుకోవడం పెద్ద సవాల్ గా మారుతోంది. ఎంత సోలోగా రావాలని ట్రై చేస్తున్నా తప్పనిసరి పరిస్థితుల్లో క్లాష్ కి సిద్ధపడుతున్నారు. డిసెంబర్ లోనూ ఇలాంటి పరిస్థితే కనిపిస్తోంది. రవితేజ హీరోగా త్రినాధరావు నక్కిన దర్శకత్వంలో రూపొందుతున్న ధమాకాని డిసెంబర్ 23కి లాక్ చేస్తూ ఇటీవలే టీజర్ లో కన్ఫర్మ్ చేసిన సంగతి తెలిసిందే. ఇప్పుడదే డేట్ కి నిఖిల్ 18 పేజెస్ ని విడుదల చేయబోతున్నట్టు నిర్మాతలు ప్రకటించేశారు. నిజానికి ఈ స్లాట్ ని గతంలో అఖిల్ ఏజెంట్ కోసం ప్లాన్ చేశారు. కానీ షూటింగ్ లో ఆలస్యం వల్ల ఆ టార్గెట్ రీచ్ కాలేమని అర్థమైపోయి 2023 సంక్రాంతికి వాయిదా వేశారు. దానికి ఖచ్చితంగా కట్టుబడి ఉంటారన్న గ్యారెంటీ లేదు.
ఇక 18 పేజెస్ ఎప్పటి నుంచో నిర్మాణంలో ఉంది. కార్తికేయ 2 తర్వాత నిఖిల్ కు ఇండియా వైడ్ మార్కెట్ రావడంతో దీంట్లో కొంత భాగం రీ షూట్ చేస్తున్నారనే వార్త చక్కర్లు కొట్టింది. దానికి తగ్గట్టే ఇటీవలే గుమ్మడి కాయ కొట్టినట్టుగా యూనిట్ పోస్ట్ చేసిన ఒక ఫోటో ఆ అనుమానాన్ని నిజం చేసింది. గీతా ఆర్ట్స్ 2 లాంటి పెద్ద బ్యానర్ లో ఇంత డిలే జరిగిన ప్రాజెక్టు ఇదే. సుకుమార్ రచన చేయగా ఆయన శిష్యుడు సూర్య ప్రతాప్ దర్శకత్వం వహించారు. గతంలో రాజ్ తరుణ్ కు కుమారి 21 ఎఫ్ లాంటి సూపర్ హిట్ ఇచ్చిన ట్రాక్ రికార్డు ఆయనది. ఈ 18 పేజెస్ లో అనుపమ పరమేశ్వరన్ హీరోయిన్ కావడం ఇతర భాషల్లో మార్కెట్ చేసుకోవడానికి సులభం అవుతుంది.
ధమాకా కమర్షియల్ ఎంటర్ టైనర్ కాబట్టి నిఖిల్ మూవీతో ఏ కోణంలోనూ పోలిక రాదు. కాకపోతే వీటికి ముందు అవతార్ 2 ఉంటుంది కనక దాని తాకిడిని తట్టుకోవడం మాత్రం అంత సులభం కాదు. హిందీ నుంచి రణ్వీర్ సింగ్ సర్కస్ కూడా బరిలో ఉంది. పూజా హెగ్డే హీరొయిన్ గా నటించిన ఆ మూవీకి రోహిత్ శెట్టి దర్శకుడు. సో క్రిస్మస్ పండగ యుద్ధం గట్టిగానే ఉండనుంది. ఒకవేళ అవతార్ బ్లాక్ బస్టర్ తెచ్చుకుంటే మాత్రం ఇతర సినిమాలకు ఇబ్బంది తప్పదు. అయితే గత ఏడాది డిసెంబర్ లో స్పైడర్ మ్యాన్ నో వే హోమ్ ని లెక్క చేయకుండా పుష్ప, శ్యామ్ సింగ రాయ్ లు మంచి ఫలితాన్ని అందుకున్నాయి. సో అంతగా భయపడాల్సిన అవసరం లేదు.
