పంది గుండె అమర్చిన తొలి వ్యక్తి మృతి

పంది గుండెను మనిషికి అమర్చి అమెరికా వైద్యులు చేసిన తొలి ప్రయోగం గుర్తుందా! రెండు నెలల క్రితం యూనివర్సిటీ ఆఫ్‌ మేరీల్యాండ్‌ మెడికల్‌ సెంటర్‌ వైద్యులు చేసిన ఈ ప్రయోగం వికటించింది. గుండె మార్పిడి జరిగిన రెండు నెలల తర్వాత.. అంటే.. మంగళవారం ఆ వ్యక్తి మరణించాడు. ఈ విషయాన్ని వైద్యులు బుధవారం వెల్లడించారు. అతడి మరణానికి కారణాన్ని చెప్పని వైద్యులు.. కొద్ది రోజుల క్రితం తీవ్ర అస్వస్థతతో ఆస్పత్రిలో చేరాడని మాత్రమే తెలిపారు.

మేరీల్యాండ్‌కు చెందిన డేవిడ్‌ బెన్నెట్‌ (57)కు ఈ ఏడాది జనవరి 7న యూనివర్సిటీ ఆఫ్‌ మేరీల్యాండ్‌ మెడికల్‌ సెంటర్‌ వైద్యులు ప్రయోగాత్మకంగా పంది గుండెను అమర్చారు. తొలినాళ్లలో గుండె పనితీరు బాగుండడంతో.. ఇక ఏ సమస్యా రాదని భావించి డిశ్చార్జి చేశారు. కొద్దిరోజులు అంతా బాగానే ఉన్నా.. ఇటీవల బెన్నెట్‌ అస్వస్థతకు గురయ్యారు. మేరీల్యాండ్‌ ఆస్పత్రి వైద్యులు వెంటనే చికిత్స ప్రారంభించినా.. ఫలితం లేకపోయింది. కాగా, ఈ ఘటనపై స్పందించిన బెన్నెట్‌ కుమారుడు.. వైద్యుల పనితీరును అభినందించారు. ‘‘పంది గుండెను అమర్చకుండా ఉంటే.. నా తండ్రి ఎప్పుడో మరణించే వారు. వైద్యులు చేసిన ప్రయోగం వల్ల రెండు నెలలు అదనంగా జీవించారు. ఈ ప్రయోగం.. ఈ దిశగా మరిన్ని ప్రయోగాలకు స్ఫూర్తిగా నిలవాలి’’ అని ఆకాంక్షించారు.