కెమికల్ ఫ్యాక్టరీలో పేలుడు.. 9 మంది మృతి, 20 మందికి గాయాలు

కెమికల్ ఫ్యాక్టరీలో సంభవించిన పేలుడు ధాటికి 9 మంది మృతి చెందగా.. మరో 20 మందికి గాయాలైన ఘటన ఉత్తరప్రదేశ్ లో జరిగింది. రాష్ట్రంలో హాపూర్ లో ఉన్న ఒక కెమికల్ ఫ్యాక్టరీలోని బాయిలర్ పేలడంతో 9 మంది కూలీలు మృతి చెందారు. మరో 20మంది కూలీలకు గాయాలయ్యాయి. పేలుడు తీవ్రత ఎక్కువగా ఉండటంతో..దాని ప్రభావం దగ్గర్లో ఉన్న ఫ్యాక్టరీలపై కూడా పడింది. ఆయా ఫ్యాక్టరీల పై కప్పులు కూడా దెబ్బతిన్నట్లు స్థానికులు తెలిపారు.

ఢిల్లీకి 80 కిలోమీటర్ల దూరంలో ఈ ఘటన జరిగింది. పేలుడు ప్రమాదం పై సమాచారం తెలిసిన వెంటనే ఫైర్ సిబ్బంది, రెస్క్యూ సిబ్బంది ఘటనా స్థలానికి చేరుకుని సహాయక చర్యలు చేపట్టారు. మూడు గంటలు శ్రమించి మంటలను అదుపు చేశారు. అనంతరం క్షతగాత్రులను సమీపంలో ఉన్న ఆస్పత్రికి తరలించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు. ప్రమాదానికి బాధ్యులైనవారిపై కఠిన చర్యలు తీసుకుంటామని తెలిపారు. కెమికల్ ఫ్యాక్టరీలో పేలుడు ప్రమాదంపై యూపీ సీఎం యోగి ఆదిత్యనాధ్ స్పందించారు. ప్రమాదంలో చనిపోయిన, గాయపడిన వారి కుటుంబాలను ఆదుకుంటామన్నారు.