కోట్లు తీసుకునే స్టార్స్ కంటే వీళ్లే తోపు.. సింగిల్ హ్యాండ్​తో గెలిపిస్తున్న అన్​క్యాప్డ్ స్టార్స్!

ఫ్రాంచైజీ క్రికెట్​లో స్టార్ ప్లేయర్లకు ఉండే డిమాండ్ గురించి సెపరేట్​గా చెప్పాల్సిన అవసరం లేదు. వీళ్ల కోసం టీమ్స్ ఎగబడతాయి. ఆక్షన్​లో కోట్లకు కోట్లు పోసి మరీ కొనుక్కుంటాయి. అభిమానులు కూడా ఇలాంటి ఆటగాళ్ల మీద బోలెడు ఎక్స్​పెక్టేషన్స్ పెట్టుకుంటారు. జట్టుకు కప్పు అందిస్తారని ఆశిస్తారు. అయితే డొమెస్టిక్ ప్లేయర్లను మాత్రం పెద్దగా ఎవరూ పట్టించుకోరు. వాళ్లు అద్భుతమైన పెర్ఫార్మెన్స్ ఇస్తే తప్ప ఫోకస్​లోకి రారు. అదే టైమ్​లో అన్​క్యాప్డ్ ఆటగాళ్లకు వచ్చే ఛాన్సులూ తక్కువే. అందుకే వారి మీద ఎవరికీ పెద్దగా అంచనాలు ఉండవు. అయితే అలాంటి ఆటగాళ్లే ఈసారి ఐపీఎల్​లో అదరగొడుతున్నారు. కోట్లు తీసుకునే స్టార్స్ కంటే వీళ్లే తోపులుగా మారారు. టీమ్స్​ను సింగిల్ హ్యాండ్​తో గెలిపిస్తున్న ఆ టాప్-5 డొమెస్టిక్ స్టార్స్ ఎవరో ఇప్పుడు చూద్దాం..

రియాన్ పరాగ్

ఒకప్పుడు చెత్త ఆటతీరుతో ఓవరాక్షన్ స్టార్​గా పేరు తెచ్చుకున్నాడు రాజస్థాన్ రాయల్స్ బ్యాటర్ రియాన్ పరాగ్. క్యాచ్ పట్టినా, సిక్స్ కొట్టినా గ్రౌండ్​లో డ్యాన్సులు వేస్తూ.. బిల్డప్ ఎక్కువ, బిజెనస్ తక్కువంటూ ట్రోలింగ్​కు గురయ్యాడు. అయితే తన బ్యాటింగ్​ మీద ఫోకస్ పెట్టిన రియాన్.. గత ఏడాది కాలంలో ఎంతో పరిణతి సాధించాడు. ఈ సీజన్​లో బ్యాట్​తో చెలరేగుతూ రాజస్థాన్ విజయాల్లో కీలకంగా మారాడు. ఆడిన మూడు మ్యాచుల్లో 2 ఫిఫ్టీలు బాదిన పరాగ్.. ఓవరాల్​గా 181 రన్స్​తో లీడింగ్ రన్ స్కోరర్ లిస్ట్​లో సెకండ్ ప్లేస్​లో నిలిచాడు.

సాయి సుదర్శన్

తమిళనాడు ప్రీమియర్ లీగ్ ద్వారా వెలుగులోకి వచ్చిన సాయి సుదర్శన్​.. ఈసారి గుజరాత్ టైటాన్స్​కు అతిపెద్ద బలంగా మారాడు. ఇతడ్ని వేలంలో రూ.20 లక్షల బేస్​ ప్రైజ్​కే దక్కించుకుంది జీటీ. ఈ సీజన్​లో బ్యాట్​తో రఫ్ఫాడిస్తున్న ఈ లెఫ్టాండర్ ఆడిన 4 మ్యాచుల్లో 160 పరుగులు చేశాడు. మిడిల్ ఓవర్లలో ఒకవైపు వికెట్ కాపాడుకుంటూనే వేగంగా పరుగులు చేస్తూ టీమ్ భారీ స్కోర్ చేయడంలో కీలకపాత్ర పోషిస్తున్నాడు సాయి. ఈ సీజన్​లో లీడింగ్ రన్ స్కోరర్స్ జాబితాలో 5వ స్థానంలో ఉన్నాడతను.

మయాంక్ యాదవ్

ఒకే ఒక్క మ్యాచ్​తో ఓవర్​నైట్ స్టార్ అయిపోయాడు లక్నో ఎక్స్​ప్రెస్ మయాంక్ యాదవ్. ఇతడ్ని వేలంలో రూ.20 లక్షల బేస్​ ప్రైజ్​కే దక్కించుకుంది లక్నో. నిలకడగా గంటకు 150 కిలోమీటర్ల వేగంతో అతడు వేస్తున్న బంతుల్ని ఎదుర్కొనేందుకు టాప్ బ్యాటర్స్ కూడా వణుకుతున్నారు. వరుసగా రెండు ప్లేయర్ ఆఫ్ ది మ్యాచ్​లు అందుకున్నాడు మయాంక్. ఎల్​ఎస్​జీకి తురుపుముక్కగా మారిన ఈ పేసర్​.. 6 వికెట్లతో పర్పుల్ క్యాప్ లిస్ట్​లో 3వ ప్లేస్​లో ఉన్నాడు.

హర్షిత్ రాణా

కోల్​కతా నైట్ రైడర్స్​ విజయాల్లో కీలకపాత్ర పోషిస్తున్నాడు హర్షిత్ రాణా. ఇతడ్ని వేలంలో రూ.20 లక్షల బేస్​ ప్రైజ్​కే దక్కించుకుంది కేకేఆర్. స్లో బౌన్సర్స్, కట్టర్స్, యార్కర్స్​తో బ్యాటర్లను ఎక్కడికక్కడ కట్టిపడేస్తున్నాడు రాణా. ఆడిన మూడు మ్యాచుల్లో 5 వికెట్లు తీశాడు. టీమ్​కు ఎప్పుడు బ్రేక్ త్రూ కావాలన్నా తాను ఉన్నానంటూ ముందుకొస్తున్నాడీ యంగ్​స్టర్.

అభిషేక్ శర్మ

యంగ్ బ్యాటర్ అభిషేక్ శర్మ సన్​రైజర్స్ హైదరాబాద్ టీమ్​ బ్యాటింగ్​లో కీలకంగా మారాడు. ఫస్ట్ బాల్​ నుంచి హిట్టింగ్​ చేస్తూ అపోజిషన్ టీమ్స్​ను భయపెడుతున్నాడీ హార్డ్ హిట్టర్. లెజెండ్ యువరాజ్ శిష్యుడు అయిన అభిషేక్.. బౌలర్లను ఊచకోత కోస్తున్నాడు. మూడు మ్యాచుల్లో 124 రన్స్ చేశాడు. ముంబై ఇండియన్స్ మీద 18 బంతుల్లోనే ఫాస్టెస్ట్ ఫిఫ్టీ బాదేశాడు.

• ఇదీ చదవండి: వీడియో: ఐపీఎల్‌ చరిత్రలోనే గ్రేటెస్ట్‌ బాల్‌! బెయిర్‌స్టోకు దిమ్మతిరిగిపోయింది!