జాతీయ అవార్డులకు ఉండే క్రేజ్ మామూలు కాదు. సినీ రంగంలో అత్యుత్తమ పురస్కారం అంటే నేషనల్ అవార్డ్స్ అనే చెప్పాలి. మన దేశంలో సినీ రంగంలోనూ కేంద్ర ప్రభుత్వం ఇచ్చే జాతీయ అవార్డులను ఎంతో ప్రతిష్టాత్మకంగా భావిస్తుంటారు. అయితే ఈ పురస్కారాల్లో టాలీవుడ్ ఎప్పుడూ వెనుకబడుతూ వస్తోంది. ఇప్పటిదాకా ఒక్క తెలుగు నటుడు కూడా ఉత్తమ నటుడి అవార్డును అందుకోలేకపోవడం గమనార్హం. అదే తమిళంలో మాత్రం విశ్వనటుడు కమల్ హాసన్ మూడు సార్లు, ధనుష్ రెండు సార్లు ఈ అవార్డులను అందుకున్నారు. దివంగత నటుడు ఎంజీఆర్, చియాన్ విక్రమ్, సూర్య ఒక్కోమారు ఉత్తమ నటుడి అవార్డును గెలుచుకున్నారు.
కన్నడ, మలయాళ ఇండస్ట్రీలకు చెందిన కొందరు ఉత్తమ నటుడి పురస్కారాన్ని అందుకున్నారు. మొత్తం దక్షిణాదిలో ఈ అవార్డును అందుకోని ఏకైక పరిశ్రమగా టాలీవుడ్ను చెప్పుకోవచ్చు. అయితే మొత్తానికి అందని ద్రాక్షగా ఉన్న ఈ అవార్డును ఈసారి తెలుగు చిత్ర పరిశ్రమ గెలుచుకుంది. 69వ నేషనల్ ఫిల్మ్ అవార్డ్స్లో ఉత్తమ నటుడిగా అల్లు అర్జున్ నిలిచారు. తద్వారా జాతీయస్థాయిలో తెలుగోడి మీసాన్ని మెలేశారు. ‘ఆర్ఆర్ఆర్’లో నటించిన జూనియర్ ఎన్టీఆర్, రామ్ చరణ్ నుంచి తీవ్ర పోటీ ఎదురైనా.. చివరకు జ్యూరీ అల్లు అర్జున్ వైపే మొగ్గు చూపింది. 2021లో విడుదలైన సినిమాలకు గానూ ఈ అవార్డులను ప్రకటించారు. ‘పుష్ప’లో అద్భుతమైన నటనకు గానూ అల్లు అర్జున్ బెస్ట్ యాక్టర్ అవార్డును అందుకున్నారు.
