వాట్సాప్ తన యూజర్లకు కొత్త ఫీచర్స్ అందించడం కోసం నిరంతరం ప్రయత్నాలు చేస్తూనే ఉంటుంది. మరికొన్ని రోజుల్లో వాట్సాప్లో కొత్తగా ఐదు ఫీచర్స్ అందుబాటులోకి రానున్నట్లు తెలుస్తోంది. అందులో సెల్ఫ్ మెసేజ్, మీడియాకు క్యాప్షన్ వంటి పలురకాల ఫీచర్స్ ఉన్నాయి. వాటి పూర్తి వివరాలు చూద్దామా మరి!
1.చాట్ విత్ యువర్ సెల్ఫ్..
ఈ ఫీచర్లో భాగంగా మన నంబర్కు మనమే మెసేజ్ చేసుకోవచ్చు. అయితే దీనికోసం ప్రత్యేకంగా ఏ విండో ఉండదు. వాట్సాప్లో మన సొంత నెంబర్ను ఎంచుకున్నప్పుడు.. ఇకపై పర్సనల్ చాట్ అనే ప్రత్యేక బాక్స్ కనిపిస్తుంది. వాట్సాప్ కాంటక్ట్ లిస్ట్లో ఇకపై మన నెంబర్ కూడా కనిపించనుంది. దీని ద్వారా సొంత నెంబర్కే.. నచ్చిన ఫైల్స్, వీడియోలు పంపించుకోవచ్చు. గతంలో.. ఒకే ఒక నెంబర్తో వాట్సాప్ గ్రూప్ని క్రియేట్ చేసి ఆ గ్రూప్లో మీడియా ఫైల్స్ను పంపించుకునే అవకాశం ఉంది.. ఇకపై అలా లేకుండా సొంత నెంబర్కే మెసేజ్ పంపించుకోవచ్చు.
2.మీడియాకు క్యాప్షన్స్..
వాట్సాప్ యూజర్లు ఫొటోలు, వీడియోలు, GIFలను ఇతరులకు ఫార్వర్డ్ చేసేటప్పుడు.. ఇకపై మీడియాతో పాటు సందేశాన్ని కూడా రాసి పంపే ఆప్షన్ అందుబాటులోకి రానుంది.
3.గ్రూప్ చాట్స్లో ప్రొఫైల్ ఫొటోస్..
ఈ ఆప్షన్తో.. గ్రూప్లో ఏదైనా మెసేజ్ వస్తే.. ఆ మెసేజ్ పంపిన వారి ప్రొఫైల్ ఫొటో కూడా కనిపిస్తుంది. ప్రైవసీ వలన వారి ప్రొఫైల్ ఫొటో కనిపించకపోతే.. గ్రూప్ చాట్లో డీఫాల్ట్గా ప్రొఫైల్ క‌నిపించేలా సెట్ చేసుకోవచ్చు.
4.ఇమేజ్లకు బ్లర్ ఆప్షన్..
వాట్సాప్లో ఇమేజ్లను బ్లర్ చేసే ఆప్షన్ ప్రస్తుతం బీటా టెస్టర్లకే అందుబాటులో ఉంది. ఏదైనా ఇమేజ్ పంపించిన‌ప్పుడు అందులోని సున్నితమైన అంశాలను బ్లర్ చేసేందుకు ఓ ఆప్షన్ రానుంది. దీనికోసం రెండు బ్లర్ టూల్స్ను వాట్సాప్ రెడీ చేస్తున్నట్టు తెలుస్తోంది. బ్లర్ సైజ్ను కూడా వినియోగదారులు తమకు నచ్చిన విధంగా పెట్టుకోవచ్చు.
5. డెస్క్టాప్లో మీడియా ఆటో డౌన్లోడ్..
డెస్క్టాప్లో మీడియా ఫైల్స్‌లో.. ఫొటోలు, వీడియోలు, పీడీఎఫ్ ఫైల్స్ వంటివి క్లిక్ చేస్తే కానీ డౌన్లోడ్ కావు. ఇకపై ఫొటోలు, వీడియోలు, డాక్యుమెంట్లు వంటివి ఆటో డౌన్లోడ్ చేసుకునేలా సెట్టింగ్స్లో మార్పులు చేయనుంది.
