కొత్త జర్నలిజం స్కూల్ ( ఇచ్చట సరికొత్త విలువలు నేర్పబడును)….

Q. సార్ , ఏదైనా బహిరంగ సభ కవరేజ్ కెళ్లినప్పుడు ఫోటోలు వీడియోలు ఎలా తీయాలి , ఎప్పుడు తీయాలి ? .
A . అది మనం ఏ పార్టీ సభకు వెళ్ళాము అన్నదాన్ని బట్టి ఉంటుంది . మన శత్రు పార్టీ సభకు వెళ్తే అందరి కన్నా ముందు వెళ్ళాలి , సభ ఏర్పాట్లు జరుగుతున్న ఫొటోస్ తీసుకోవాలి , సభకి జనాలు ఏ వెహికల్స్ లో వస్తున్నదీ గమనించాలి . ఆ దారిలో లేదా ఆ ప్రాంతానికి దగ్గర్లో వెళ్తోన్న ఆర్టీసీ వెహికల్స్ ఫొటోలు , స్కూల్ బస్ ఫోటోలు వెతికి తీసి జాగ్రత్త చేయాలి .సభ మొత్తాన్ని జాగ్రత్తగా గమనించి ఎవడైనా రాత్రి నిద్రపోక పొరపాట్న కూరిపాట్లు పడుతుంటే వాడిని పది యాంగిల్స్ లో ఫోటో వీడియోస్ తీయాలి . సభ పై ప్రసంగించే వారి పక్కనున్న వారి హావభావాల్లో చిన్న తేడా ఉన్నా దాన్ని జాగ్రత్తగా షూట్ చేయాలి .

తర్వాత తీరిగ్గా సభ ముగిసిన తర్వాత ఖాళీకుర్చీలు ఫొటోలు , సభ పై ప్రసంగిస్తున్న ఫొటోలు పక్క పక్కన ప్రచురించి సభ విఫలమైందని చెప్పాలి . సభలో ప్రసంగించిన వారి మాటలకి వక్రభాష్యాలు అంటగట్టే ప్రయత్నాలు చెయ్యాలి . కాస్త కూరిపాట్లు పడ్డ వాడి వీడియో రిపీటెడ్ గా చూపించి సభికుల ప్రసంగాలు బోర్ కొట్టి జనాలు అందరూ నిద్రలు పోయారు అని క్రియేట్ చేయాలి . ఇహ లైవ్ ఇచ్చే ప్రోగ్రామ్ ఇంకా జాగ్రత్తగా చేయాలి . ఇక్కడి సంఘటన స్క్రీన్ లో 25 పెర్సన్ట్ లైవ్ ఇస్తూ మిగతా 75 పెర్సన్ట్ లో దీనికి వ్యతిరేకంగా జరుగుతున్న ఆందోళనలు బలంగా ప్రెసెంట్ చేయాలి . విశ్లేషణలు ఎంత వ్యతిరేకంగా ఉన్నాయో ప్రజలకి స్పష్టంగా తెలిసేట్టు లైవ్ ని లైట్ గా చూపిస్తూ విశ్లేషకుల్ని ఎక్స్పోజ్ చేయాలి .

Q . అప్పటికప్పుడు ఆందోళనలు , విశ్లేషకులు ఎక్కడ దొరుకుతారు సర్ .
A . పిచ్చోడా ఎక్కడా దొరకరు ఆందోళనలు , ధర్నాలు , పోరాటాలు ఇవన్నీ ముందే మనం మన పార్టీతో కలిసి ప్లాన్ చేసుకొని ఆ సమయానికి మొదలెట్టించి షూట్ చేయాలి . అలాగే మన పెర్మినెంట్ విశ్లేషకులతో అదే టైంకి ఆఫీస్ లో ప్రోగ్రాం పెట్టించాలి . వీటన్నింటినీ చాలా జాగ్రత్తగా కో ఆర్డినెట్ చేసుకోవాలి . ముఖ్యంగా వ్యతిరేకంగా ప్రెసెంట్ చేసేప్పుడు మనం వాడే పదాలులో లోపాలు ఉండకూడదు .

Q . ఓ ఉదాహరణ చెప్తారా సర్ .
A . సభకి భారీగా జనం వచ్చినప్పుడు మనం ఖాళీ కుర్చీల ఫొటోస్ చూపించి రాలేదు అని చెప్తామ్ . అదే టైంలో చుట్టుపక్కల ఉన్న స్కూల్ , ఆర్టీసీ బస్సుల ఫొటోలు చూపించి జనాన్ని తరలించారు అని చెప్తామ్ . అప్పుడు ఆయా బస్సుల్లో జనాన్ని భారీగా తరలించారు అని రాయకూడదు . అలా రాస్తే జనం హాజరుని మనమే ఒప్పుకొన్నట్టు అవుతుంది . అలా కాకుండా జనాన్ని ప్రభుత్వ , పాఠశాలల బస్సుల్లో బలవంతంగా తరలించే ప్రయత్నం చేసినా పెద్దగా రాలేదు . వచ్చిన కొద్ది మంది సభ ప్రారంభం కాగానే విసుగుతో పలాయనమ్ చిత్తగించారు అని రాయాలి . ఇందుకు గానూ సభలో మంచినీళ్లు కోసం అటూ ఇటూ తిరిగే వాడి ఫోటో పెట్టి పారిపోటానికి దారులు వెతుకుతున్నారు అని చెప్పాలి .

Thank you sir , మరి మేము వెళ్ళొస్తాం .

అదేంటోయ్ కోర్స్ కంటిన్యూ చేయరా ,వద్దులే సార్ ..XXXXX