ఉభయ తెలుగు రాష్ట్రాలకు కేంద్ర ప్రభుత్వం గుడ్ న్యూస్ చెప్పింది. ఆంధ్రప్రదేశ్, తెలంగాణలో రైల్వే లైన్ల విస్తరణకు సంబంధించి కేంద్ర కేబినెట్ కీలక నిర్ణయాలు తీసుకుంది. రెండు తెలుగు రాష్ట్రాలతో పాటు తొమ్మిది రాష్ట్రాల్లో ఏడు మల్టీ-ట్రాకింగ్ ప్రాజెక్టులకు కేంద్ర సర్కారు ఆమోదం తెలిపింది. ఏపీ-తెలంగాణ విషయానికొస్తే.. గుంటూరు-బీబీనగర్ డబ్లింగ్కు మోడీ ప్రభుత్వం ఆమోదం తెలిపింది. సుమారుగా రూ.3,238 కోట్ల అంచనా వ్యయంతో 272 కిలోమీటర్ల మేర ఈ రూట్లో డబ్లింగ్ పనులు చేపట్టాలని నిర్ణయించింది.
డోన్-మహబూబ్ నగర్, మేడ్చల్-ముద్ఖేడ్ (మొత్తంగా 502 కిలోమీటర్లు) రూట్లలోనూ డబ్లింగ్ పనులకు కేంద్ర కేబినెట్ ఆమోదం తెలిపింది. దాదాపు రూ.5,655 కోట్ల అంచనా వ్యయంతో ఈ మార్గంలో డబ్లింగ్ పనులు చేపట్టాలని డిసైడ్ అయింది. అలాగే నెర్గుండి-బారాంగ్, కుర్దా రోడ్-విజయనగరం నడుమ (417 కిలోమీటర్లు) రూ.5,618 కోట్ల అంచనా వ్యయంతో మూడో లైన్ ఏర్పాటుకు కేంద్ర కేబినెట్ గ్రీన్ సిగ్నల్ ఇచ్చింది. దేశంలో రైల్వే లైన్ల విస్తరణతో పాటు ట్రైన్స్ రాకపోకలను క్రమబద్ధీకరించడం, రద్దీని తగ్గించడమే టార్గెట్గా చర్యలు చేపడుతున్నట్లు పేర్కొంది.
రైల్వే లైన్ల విస్తరణ, రాకపోకల క్రమబద్ధీకరణ, రద్దీని తగ్గించడమే లక్ష్యంగా పనిచేస్తున్న కేంద్రం.. అందుకోసం రూ.32,500 కోట్ల అంచనా వ్యయాన్ని పెట్టుకుంది. దీంట్లో భాగంగా ఉత్తరప్రదేశ్, బిహార్, తెలంగాణ, ఆంధ్రప్రదేశ్తో పాటు మహారాష్ట్ర, గుజరాత్, ఒడిశా, ఝార్ఖండ్, పశ్చిమ బెంగాల్ రాష్ట్రాల్లోని 35 జిల్లాల పరిధిలో ప్రస్తుతం ఉన్న రైల్వే నెట్వర్క్లను విస్తరించనున్నారు. ఇక, పీఎం ఈ-బస్ స్కీముకూ కేంద్ర మంత్రివర్గం ఆమోదం తెలిపింది. దేశంలోని మొత్తం 169 సిటీల్లో 10 వేల ఈ-బస్లను కేంద్రం ప్రవేశపెట్టనుంది. అలాగే దేశవ్యాప్తంగా 181 నగరాల్లో గ్రీన్ ఈ-మొబిలిటీ కోసం మౌలిక సదుపాయాలను పెంచాలని నిర్ణయించింది.
