జస్ప్రీత్ బుమ్రా.. భారత క్రికెట్ అభిమానులకు పరిచయం అక్కర్లేని పేరు. ఈ పేసర్ అనతి కాలంలోనే భారత జట్టులో ప్రధాన ఆటగాడిగా ఎదిగాడు. ఐపీఎల్లో ముంబై ఇండియన్స్ తరఫున ఆడుతూ వెలుగులోకి వచ్చాడు బుమ్రా. ఐపీఎల్లో అద్భుతమైన ప్రదర్శనతో భారత జట్టులో చోటు సంపాదించాడు. కచ్చితమైన పేస్తో యార్కర్లు, స్వింగింగ్ డెలివరీస్ను సంధిస్తూ ప్రపంచ మేటి బ్యాటర్లను వణికించాడు. క్రమంగా టీమిండియా తరఫున మూడు ఫార్మాట్లలోనూ ఆడుతూ.. వరల్డ్ టాప్ బౌలర్లలో ఒకడిగా అందరి ప్రశంసలు అందుకున్నాడు. అయితే గాయాలు బుమ్రా కెరీర్ను తీవ్రంగా ఇబ్బంది పెడుతున్నాయి.
తక్కువ రనప్తో భిన్నమైన శైలితో బౌలింగ్ చేసినా గంటకు 140 కి.మీ.కు తగ్గకుండా బంతులు సంధించడం బుమ్రా ప్రత్యేకత. అయితే ఈ బౌలింగ్ శైలి వల్ల అతడు నిత్యం గాయాలపాలవుతున్నాడు. ప్రస్తుతం ఇంజ్యురీ నుంచి కోలుకున్న భారత పేసుగుర్రం.. త్వరలో జరిగే ఐర్లాండ్ పర్యటనతో పునరాగమనం చేస్తున్నాడు. దాదాపు ఏడాది తర్వాత క్రికెట్ ఫీల్డ్లోకి దిగనున్న బుమ్రాపై భారీగా అంచనాలు నెలకొన్నాయి. ఈ నేపథ్యంలో టీమిండియా స్టార్ పేసర్పై ఆస్ట్రేలియా దిగ్గజ బౌలర్ గ్లెన్ మెక్గ్రాత్ ఇంట్రెస్టింగ్ కామెంట్స్ చేశాడు. బుమ్రా త్వరగా రిటైర్మెంట్ తీసుకోవాలని మెక్గ్రాత్ సూచించాడు.
ఇంటర్నేషనల్ క్రికెట్లో ఎక్కువ కాలం కొనసాగాలంటే ఏదో ఒక ఫార్మాట్ నుంచి బుమ్రా తప్పుకుంటే మంచిదని మెక్గ్రాత్ అభిప్రాయపడ్డాడు. అతడి బౌలింగ్కు తాను పెద్ద అభిమానినని.. అయితే బౌలింగ్ శైలి భిన్నంగా ఉండటంతోనే శరీరంపై అధిక భారం పడుతోందన్నాడు. ఈ సమస్యను అధిగమించాలంటే బుమ్రా మరింత బలంగా తయారవ్వడంతో పాటు తగినంత విశ్రాంతి తీసుకోవాల్సిన అవసరం ఉందన్నాడు మెక్గ్రాత్. ప్రస్తుతం క్రికెటర్లు విశ్రాంతి లేని క్రికెట్ ఆడుతూ అలసిపోతున్నారని.. కాబట్టి ఇంజ్యురీలు అవ్వడం సాధారణమేనని ఆయన చెప్పుకొచ్చాడు. బుమ్రా దీన్ని దృష్టిలో ఉంచుకొని.. టీమిండియాకు ఎక్కువ కాలం ఆడాలంటే ఏదో ఒక ఫార్మాట్కు గుడ్ బై చెప్పాలని మెక్గ్రాత్ పేర్కొన్నాడు.
