చంపే హక్కు ఎవరిచ్చారు? సరూర్‌నగర్ పరువు హత్యపై స్పందించిన ఒవైసీ..

రెండు రోజుల క్రితం హైదరాబాద్ సరూర్ నగర్ లో జరిగిన పరువు హత్య సంచలనం సృష్టించింది. ఆశ్రీన్ అనే ఓ ముస్లిం అమ్మాయి, నాగరాజు అనే ఓ దళిత హిందూ అబ్బాయి గత కొన్ని సంవత్సరాలుగా ప్రేమించుకొని ఆశ్రీన్ ఇంట్లో ఒప్పుకోకపోవడంతో పెళ్లి చేసుకొని హైదరాబాద్ కి వచ్చి జీవితం గడుపుతుండగా అమ్మాయి సోదరుడు మతాంతర వివాహం చేసుకుందని పగబట్టి రెక్కీ నిర్వహించి మరీ ఆ యువకుడిని మరికొంతమందితో కలిసి నడిరోడ్డు మీదే చంపేశాడు. ఈ పరువు హత్య రాజకీయాల్లో కూడా కలకలం సృష్టిస్తుంది.

దేశంలో ఎక్కడ ముస్లింలపై దాడులు జరిగినా స్పందించే ఒవైసీ సరూర్ నగర్ ఘటనపై మాత్రం ఎందుకు స్పందించట్లేదని పలువురు బీజేపీ నేతలు ప్రశ్నించారు. తాజాగా ఈ పరువు హత్య ఘటనని ఖండిస్తూ అసదుద్దీన్ ఒవైసీ స్పందించారు. హైదరాబాద్ దారుస్సలాంలో నిర్వహించిన ఈద్ మిలాప్ కార్యక్రమంలో ఒవైసీ దీనిపై మాట్లాడారు.

ఒవైసీ మాట్లాడుతూ.. సరూర్‌నగర్‌లో జరిగిన పరువు హత్య ఘటనను తీవ్రంగా ఖండిస్తున్నాం. ఆమె(ఆశ్రిన్ సుల్తానా) ప్రేమించి ఇష్టంగానే ఆ వ్యక్తిని (నాగరాజు) పెళ్లి చేసుకుంది. అది తప్పేం కాదు. కానీ సుల్తాన్ సోదరుడికి ఆమె భర్తను చంపే హక్కు ఎవరిచ్చారు? రాజ్యాంగం ప్రకారం హత్య చేయడం దారుణమైన నేరం. ఇస్లాం ప్రకారం కూడా హత్య చేయడం చాలా తప్పు. ఈ హత్య ఘటనలో నిందితులను పోలీసులు అరెస్ట్ చేశారు. మేము హంతకుల పక్షాన నిలబడేవాళ్లం కాదు అని అన్నారు.

 

.