అర్జున్ రెడ్డి, గీత గోవిందం వంటి చిత్రాలతో సంచలన విజయాలు అందుకొని తిరుగులేని క్రేజ్ సొంతం చేసుకున్న విజయ్ దేవరకొండ నాలుగేళ్లుగా హిట్ మొహం చూడలేదు. ఈ నాలుగేళ్లలో విజయ్ నటించిన మూడు సినిమాలు విడుదల కాగా.. అందులో ఒకటి కూడా ఆదరణకు నోచుకోలేదు. ముఖ్యంగా పూరి జగన్నాథ్ దర్శకత్వంలో చేసిన లైగర్ తో పాన్ ఇండియా రేంజ్ లో భారీ క్రేజ్ వస్తుందని ఆశ పడ్డాడు. కానీ ఆ సినిమా ఘోర పరాజయాన్ని మూటగట్టుకుంది. ఈ క్రమంలో సరైన విజయం కోసం ఎంతగానో ఎదురు చూస్తున్న విజయ్.. వరుసగా నాని దర్శకులతో సినిమాలు చేస్తుండటం ఆసక్తికరంగా మారింది.
విజయ్ ప్రస్తుతం ఖుషి అనే సినిమా చేస్తున్నాడు. దీనికి శివ నిర్వాణ దర్శకుడు. నాని హీరోగా నటించిన నిన్నుకోరి సినిమాతో దర్శకుడిగా పరిచయమైన శివ మొదటి సినిమాతోనే మంచి విజయాన్ని అందుకున్నాడు. నాని హీరోగా టక్ జగదీష్ అనే మరో చిత్రం కూడా చేశాడు. ఇప్పుడు విజయ్ తో తొలిసారిగా ఖుషి కోసం చేతులు కలిపాడు. సమంత హీరోయిన్ గా నటిస్తున్న ఈ మూవీపై మంచి అంచనాలున్నాయి. గీత గోవిందం తర్వాత అంతటి హిట్ ఇచ్చే సినిమా ఇదేనని విజయ్ ఫ్యాన్స్ నమ్ముతున్నారు.
తాజాగా మరో నాని దర్శకుడితో కొత్త సినిమాని ప్రకటించాడు విజయ్. నాని కెరీర్ లో గుర్తిండిపోయే సినిమాల్లో జెర్సీ ముందు వరుసలో ఉంటుంది. ఆ చిత్రానికి గౌతమ్ తిన్ననూరి దర్శకుడు. ఇప్పుడు ఆయన విజయ్ హీరోగా ఓ సినిమా చేయనున్నాడు. సితార ఎంటర్టైన్మెంట్స్ నిర్మిస్తున్న ఈ చిత్రాన్ని తాజాగా అధికారికంగా ప్రకటించారు. ఇదొక స్పై ఫిల్మ్. జెర్సీ దర్శకుడు కావడం, విజయ్ తొలిసారి గూఢచారి వంటి విభిన్న పాత్రలో కనిపించనుండటంతో ఈ సినిమా అందరి దృష్టిని ఆకర్షించింది. నిజానికి గౌతమ్.. రామ్ చరణ్ 16వ సినిమా RC16 ని డైరెక్ట్ చేయాల్సి ఉంది. కానీ ఎందుకనో ఆ ప్రాజెక్ట్ ఆగిపోయింది. అప్పటి నుంచి విజయ్ తో గౌతమ్ తదుపరి మూవీ అంటూ వార్తలు వినిపించాయి. ఇక ఇప్పుడు అధికారిక ప్రకటన కూడా వచ్చేసింది. మరి ఇలా నాని దర్శకులతో బ్యాక్ టు బ్యాక్ సినిమాలు చేస్తున్న విజయ్ ఎలాంటి ఫలితాన్ని అందుకుంటాడో చూద్దాం.
