ఇలాంటి దమ్మున్న “దామిని”లు కావాలి – Nostalgia

ఎందుకీ ప్రస్తావన ?
ప్రతిరోజూ మహిళలపై లైంగిక వేధింపులు, హత్యాచారాలు దేశంలో ఏదో ఒక మూల జరుగుతూనే ఉన్నాయి. శిక్షలు విధించడంలో చట్ట పరిమితుల సాకుతో ప్రభుత్వాలు చూపుతున్న అలసత్వం కారణంగా వీటికి ఇప్పటికిప్పుడు అడ్డుకట్ట పడే మార్గం కనిపించడం లేదు. ఫలితంగా నిత్యం దినపత్రికల్లో, టీవీ మీడియాలో కనీసం ఐదు నుంచి పది దాకా ఇలాంటి సంఘటనలు వార్తల రూపంలో ప్రజలు చదివి నిట్టూర్చే దారుణమైన పరిస్థితి తలెత్తింది. ఈ దురాగతాలు పరంపర ఇప్పటిది కాదు.

పోనీ ఈ వ్యవస్థలో మార్పు కోసం నాయకులెవరైనా తీవ్రంగా కృషి చేశారా అంటే అదీ లేదు. బాధితుల కుటుంబాలను ఓదార్చి మైకుల ముందు నాలుగు కంటితుడుపు మాటలతో సరిపుచ్చుతున్నారు తప్పించి వాళ్లలో నిజాయితీ కొరవడిందన్నది కాదనలేని సత్యం. ఇక్కడ కామ వాంఛలకు బలవుతున్నది ప్రత్యేకించి ఏ వర్గం వారో కాదు. ఎక్కడో బీహార్ లో ఓ దళిత బాలిక మొదలుకుని ఇక్కడి హైదరాబాద్ లో ఉన్నత కులానికి చెందిన డాక్టర్ దాకా అందరూ ఉన్నారు. సామాజిక వర్గం కోణంలోనే వీటిని ఆపాదించాలనుకోవడం హేయం. ఇలాంటి నేపధ్యాన్ని తీసుకుని పాతికేళ్ళ క్రితం 1993లో బాలీవుడ్ దర్శకుడు రాజ్ కుమార్ సంతోషి ఆవిష్కరించిన ఓ వెండితెర అద్భుతం దామిని గురించి చర్చించాల్సిన అవసరం ఎంతైనా ఉంది. ముందుగా కథలోకి వెళ్తే

ఎవరీ దామిని
మధ్యతరగతికి చెందిన అమ్మాయి దామిని(మీనాక్షి శేషాద్రి). అందంతో పాటు చక్కని సుగుణాలు కలిగిన ఈ లావణ్య రాశిని ఓ డాన్స్ ప్రోగ్రాంలో చూసిన శేఖర్ గుప్తా(రిషి కపూర్)తన మీద మనసు పారేసుకుంటాడు. నగరంలో అత్యంత ధనవంతుల కుటుంబాల్లో ఒకరైన బిజినెస్ ఫ్యామిలీకి చెందిన శేఖర్ ప్రేమ వ్యవహారం ఇంట్లో వాళ్ళకు బొత్తిగా ఇష్టం ఉండదు. అయినా శేఖర్ పట్టుబట్టడంతో పెళ్లి చేసి దామినిని కోడలిగా స్వాగతిస్తారు. ఆ ఇంట్లో పనిమనిషిగా ఉన్న ఉర్మి(ప్రజక్తి)దామినికి బాగా దగ్గరవుతుంది. హోలీ పండగ సందర్భంలో ఇంట్లో అందరూ కోలాహలంలో మునిగి ఉండగా శేఖర్ చిన్నతమ్ముడు రాకేశ్(అశ్విన్ కౌశల్)అతని స్నేహితులు మందు నిషాలో ఉర్మిని దారుణంగా మానభంగం చేస్తారు. ఇది శేఖర్ దామినిలు కళ్ళారా చూస్తారు. ఉర్మి ఆసుపత్రి పాలవుతుంది.  

ఉర్మికి న్యాయం జరగడం కోసం స్వంత కుటుంబానికి వ్యతిరేకంగా నిలబడి దామిని న్యాయ పోరాటం మొదలుపెడుతుంది. గుప్తా ఫ్యామిలీ కోసం సుప్రసిద్ధ లాయర్ చడ్డా(అమ్రిష్ పూరి)రంగంలోకి దిగుతాడు. కోర్టులో తన వాగ్ధాటితో అనూహ్యంగా దామినినే మతిస్థిమితం లేని దానిగా రుజువు చేసి పిచ్చాసుపత్రిలో చేరేలా చేస్తాడు. మరోవైపు ఉర్మి పరిస్థితి విషమంగా మారి చనిపోతుంది. తన చావును పోలీసులు ఆత్మహత్య గా చిత్రీకరించే క్రమంలో దామిని ఆసుపత్రి నుంచి తప్పించుకుని ప్రాక్టీసు మానేసి తాగుబోతైన లాయర్ గోవింద్(సన్నీ డియోల్) ఆశ్రయం పొందుతుంది. దామిని నిజాయతి గుర్తించిన గోవింద్ చడ్డాకు దీటుగా కోర్టులో పోరాటం చేస్తాడు. కథ ఎన్నో మలుపులు తిరిగాక ఆఖరికి శేఖర్ తన భార్యకు మద్దతుగా నిలవడంతో నిందితులకు శిక్ష పడుతుంది. దామిని విజయం సాధిస్తుంది.

దామిని నేర్పించే పాఠం
ఇందులో నేర్చుకోవాల్సిన విషయాలు, నగ్నసత్యాలు చాలా ఉన్నాయి. ముఖ్యంగా డబ్బుంటే చాలు మనం ఏం చేసినా చెల్లుతుందనే బడా బాబుల స్వరూపాన్ని కళ్ళకు కట్టినట్టు చూపిస్తారు. ఇప్పటికీ కోర్టు గడపలు ఎక్కకుండా పంచాయితీల పేరుతో పోలీస్ స్టేషన్ లోనే సెటిలైపోయే కేసులు రోజుకు కోకొల్లలు. ఇక్కడ ప్రధాన పాత్ర వహించేది కరెన్సీనే. అత్యాచారాలు జరిగినప్పుడు ఎక్కువ శిక్ష పడిన వాళ్ళ జాబితాను కనక పరిశీలిస్తే పెద్దగా బ్యాక్ గ్రౌండ్ లేని వాళ్లే ఎక్కువగా కనిపిస్తారు. మరి ధనవంతుల బిడ్డలు చేసే దుర్మార్గాలు ఎక్కడ దారి మళ్లుతున్నాయి.