మన దేశంలో క్రికెట్ను ఇష్టపడనివారు ఎవరుంటారు చెప్పండి! సినిమాలతో పాటు క్రికెట్ అంటే భారతీయులకు ఎంతో ఇష్టం. ఇండియాలోనే కాదు పాకిస్థాన్, శ్రీలంక, బంగ్లాదేశ్ లాంటి మిగిలిన ఆసియా దేశాల్లో జెంటిల్మన్ గేమ్ను ఇష్టపడేవారు కోట్లాది సంఖ్యలో ఉన్నారు. ఆసియా దేశాల్లో క్రికెట్ను ఒక మతంలా, క్రికెటర్లను దేవుళ్లలా భావిస్తారని చెప్పడం ఎంతమాత్రమూ అతిశయోక్తి కాదు. మ్యాచ్ జరుగుతోందంటే చాలు.. ప్రేక్షకులు టీవీలు, మొబైల్ ఫోన్లకు అతుక్కుపోతారు. అదృష్టం బాగుండి టికెట్ దొరికితే నేరుగా స్టేడియంలోనే తమ ఆరాధ్య ఆటగాళ్ల క్రీడా విన్యాసాలను చూసి ఆనందిస్తారు.
క్రికెట్ మ్యాచ్ల టికెట్లకు ఉండే డిమాండ్ అంతా ఇంతా కాదు. ఆసియా కప్, వరల్డ్ కప్ లాంటి క్రేజీ టోర్నీలకు సంబంధించిన మ్యాచ్లతో పాటు ఇండియా-పాకిస్థాన్ మ్యాచ్లకు టికెట్లకు రెక్కలు వచ్చేస్తాయి. ఇదిలా ఉంటే.. స్టేడియాల్లో ఒక్కోసారి అనూహ్య పరిణామాలు చోటుచేసుకుంటాయి. మైదానాల్లో క్రికెటర్లు సీరియస్గా ఆడుతున్న టైమ్లో నిరసనకారులు, ఫ్యాన్స్ రావడాన్ని చూశాం. కొన్నిసార్లు కుక్కలు, పిల్లులు లాంటి జంతువులు వచ్చి ఆటకు అంతరాయం కలిగించిన సందర్భాలు కూడా ఉన్నాయి. ఇలాగే ఒక మైదానంలో పాము వచ్చింది. ఈ ఘటన పొరుగు దేశం శ్రీలంకలో చోటుచేసుకుంది.
లంక ప్రీమియర్ లీగ్లో భాగంగా గాలె టైటాన్స్-దంబుల్లా ఆరా జట్ల మధ్య ఒక మ్యాచ్ జరుగుతోంది. అయితే మ్యాచ్ జరుగుతున్న సమయంలో అవుట్ ఫీల్డ్లోకి ఒక పెద్ద పాము వేగంగా పాకుతూ లోపలికి వచ్చింది. అదే టైమ్లో బౌండరీ దగ్గర ఫీల్డింగ్ చేస్తున్న పేస్ బౌలర్ ఇసురు ఉదాన వెనక్కి నడుస్తూ వస్తున్నాడు. అయితే హఠాత్తుగా పామును గమనించిన అతడు.. దానికి దూరంగా జరగడంతో పెను ప్రమాదం తప్పింది. అనంతరం గ్రౌండ్స్మెన్ ఆ పామును పట్టుకొని బయటకు తీసుకెళ్లారు. స్టేడియంలోకి పాము వచ్చిన వీడియో సోషల్ మీడియాలో వైరల్ అవుతోంది.
Snake in LPL…!!!!
A lucky escape for Udana. pic.twitter.com/R3Gg2yxVkh
— Johns. (@CricCrazyJohns) August 13, 2023
