డిగ్రీలు, పోస్ట్ గ్రాడ్యుయేష‌న్లు, లాయ‌ర్లు, డాక్ట‌ర్లు ఎమ్మెల్యేలుగా చాలామంది ఎన్నిక‌వుతుంటారు. కొంద‌రి ఎమ్మెల్యేల‌కు ఇంట‌ర్, లేదంటే ప‌దో త‌ర‌గ‌తి వ‌ర‌కే చ‌దువుతారు. కాని చ‌దువుకున్న ఎమ్మెల్యే అంటేనే జ‌నంలో బాగా క్రేజ్. ఇంత‌కీ ఒక ఎమ్మెల్యే పనితీరుకు డిగ్రీకి ఏమైనా సంబంధ‌ముందా?
చాలా పార్టీలో మేం ఇంత‌మంది గ్రాడ్యుయేట్స్ ల‌కు టిక్కెట్లు ఇచ్చామ‌ని ఘ‌నంగా చెప్పుకొంటాయి. నిజంగా బాగా చ‌దువుకొంటే బాగా ప్ర‌జ‌ల‌కు స‌దుపాయాల‌ను క‌ల్పించ‌గ‌ల‌రా?
ఈ విష‌య‌పై ఢిల్లీకి చెందిన ఇంటర్నేషనల్ ఇనిషియేటివ్ ఫర్ ఇంపాక్ట్ ఎవాల్యుయేషన్ (IIIE) త‌రపున చందన్ జైన్ నిర్వహించిన అధ్యయనానికి, యునైటెడ్ నేషన్స్ యూనివర్శిటీ వరల్డ్ ఇన్‌స్టిట్యూట్ ఫర్ డెవలప్‌మెంట్ ఎకనామిక్స్ రీసెర్చ్ ( United Nations University World Institute for Development Economics Research -UNU WIDER) నిధులు సమకూర్చింది. ఇప్పుడు ఆ నివేదిక విడుదల అయ్యింది.
చ‌దువుకు నియోజ‌క‌వ‌ర్గ అభివృద్దికి మ‌ధ్య‌నున్న సంబంధాన్ని తెలుసుకోవ‌డానికి, జైన్ అత‌ని టీం 2009-2013 మధ్యలో అసెంబ్లీ ఎన్నికల డేటాను అధ్యయనం చేశారు. ఒక నియోజ‌క‌వ‌ర్గం అభివృద్ధి సూచికలపై ఎమ్మెల్యేల చ‌దువు ప్రభావాన్ని పరిశీలించారు. 10,898 మంది ఎమ్మెల్యేల డేటాను స్కాన్ చేసారు. అందులో 6,619 మంది గ్రాడ్యుయేట్లు ఉంటే, పోస్ట్ గ్రాడ్యుయేట్ లేదా డాక్టరేట్ స్థాయి ఉన్న‌వాళ్లు 1,639 మంది. ఇంట‌ర్ , లేదంటే అంత‌క‌న్నా త‌క్కువ చ‌దివిన వాళ్ల సంఖ్య 2,640 మంది. అంటే ఎమ్మెల్యేల్లో గ్రాడ్యుయేట్లే ఎక్కువ మంది.
మరి అసెంబ్లీ నియోజ‌వ‌ర్గాల అభివృద్ధి సూచ‌క‌లేంటి? అన్నింటిని ట్రాక్ చేయ‌డం క‌ష్టం కాబ‌ట్టి, రాత్రివేళ కరెంట్ వినియోగాన్ని లెక్క‌లోకి తీసుకున్నారు. ఉపగ్రహాల చిత్రాలను అధ్యయనం చేశారు.
ఒక ప్రాంత ఆర్ధికాభివృద్ధిని అంచ‌నావేయాలంటే రాత్రిపూట లైట్ల వినియోగాన్ని లెక్క‌వేస్తారు. ప్రపంచ బ్యాంకుతో సహా, అనేక మంది పరిశోధకులు విద్యుత్ వాడ‌కాన్నే అభివృద్ధి ప్రమాణంగా ప‌రిగ‌ణిస్తారు.
మౌలిక సదుపాయాలపై డేటా కోసం 2011 జనాభా గణనను కూడా అధ్యయనం చేశారు. శాంతి భ‌ద్ర‌త‌ల‌ను లెక్క‌వేయ‌డానికి నేషనల్ క్రైమ్ రికార్డ్స్ బ్యూరో నుండి, క్రైమ్ డేటాను, ఎమ్మెల్యేల ఆస్తుల‌ను లెక్క‌వేయ‌డానికి , NGO అసోసియేషన్ ఫర్ డెమోక్రటిక్ రిఫార్మ్స్ నుంచి డేటా కూడా తీసుకున్నారు. అంటే ఎమ్మెల్యే ఆర్ధిక‌ప‌రిస్థితిని, ఆ ప్రాంతంలో నేరాలు, ఆర్ధిక అభివృద్ధితోపాటు కరెంట్ వినియోగాన్ని లెక్క‌వేశారు.
ప్ర‌భుత్వ ఆస్తులు, రోడ్లు, విద్యుత్ వినియోగానికి మ‌ధ్య లింక్ ఉంది. వీట‌న్నింటిని లెక్క‌వేస్తే ఒక ప్రాంతం ఎంత‌గా ఎదిగిందో అంచ‌నావేయొచ్చు. కాని ఇదంతా ప‌క్క‌గా ఉంటుంద‌ని మాత్రం చెప్ప‌లేం. ఆ ఆ సంగ‌తి ప‌రిశోధ‌కుల‌కు కూడా తెలుసు.
గ్రాడ్యుయేట్ వర్సెస్ నాన్ గ్రాడ్యుయేట్ ఎమ్మెల్యేలు
ఎమ్మెల్యేల‌ను మూడు రకాలుగా విభ‌జించారు. ఒక‌టి, క‌నీసం ప‌దో త‌ర‌గ‌తి పాస్ కానివారు. రెండో త‌ర‌గ‌తి ఇంట‌ర్ వ‌ర‌కు చ‌దివిన వాళ్లు, మూడో త‌ర‌గ‌డి గ్రాడ్యుయేట్లు. ఇంత‌కీ చ‌ద‌వుకీ ఆ నియోజ‌క‌వ‌ర్గ అభివృద్ధికి ఏమైనా సంబంధ‌ముందా?
నివేదిక ఒక విష‌యాన్ని స్ప‌ష్టంగా చెప్పింది. ఇంట‌ర్, అంత‌క‌న్నా త‌క్కువ చ‌దువుకున్న ఎమ్మెల్యేలు క‌న్నా, గ్రాడ్యుయేట్ ఎమ్మెల్యేల ప‌నితీరులో కాస్త తేడా ఉంది. గ్రాడ్యుయేట్ ఎమ్మెల్యే ఉన్న ప్రాంతాల్లో కరెంట్ వినియోగం 3.28శాతం ఎక్కువ. అంటే చ‌దువుకున్న ఎమ్మెల్యేలు అభివృద్ధి కోసం కొన్ని ప్లాన్లు వేశారు. అలాగ‌ని నియోజ‌క‌వ‌ర్గ రూపురేఖ‌లు మారిపోయాయ‌ని అనుకోవ‌ద్దు. ప్ర‌భుత్వ ఆస్తులు పెర‌గ‌డం, రోడ్లు లాంటి మౌలిక స‌దుపాయాల క‌ల్ప‌న‌పై కాస్తంత సానుకూల ప్ర‌భావం ఉన్నా పెద్ద‌గా మార్పు క‌నిపించ‌లేదు.
రోడ్లు, విద్యుత్ వినియోగంతో క‌లిపిచూస్తే, గ్రాడ్యుయేట్ అభ్య‌ర్ధిని ఎన్నుకోవ‌డం వ‌ల్ల అభివృద్దిలో పెద్ద‌గా మార్పేమీ లేదు.
మరి శాంతి భ‌ద్ర‌త‌ల సంగ‌తేంటి? NCRB డేటాను బ‌ట్టిచూస్తే చ‌దువుకున్న ఎమ్మెల్యేలున్న చోట్ల క‌నీసం రెండుశాతం వ‌ర‌కు నేరాలు త‌గ్గాయి. అలాగ‌ని అవినీతిలో ఎలాంటి మార్పూలేదు.
