ప్రతిష్టాత్మక వన్డే వరల్డ్ కప్కు సమయం దగ్గర పడుతోంది. ఈసారి మెగా టోర్నీకి భారత్ ఆతిథ్యం ఇస్తున్న సంగతి తెలిసిందే. 50 ఓవర్ల ఫార్మాట్లో బహుశా ఇదే చివరి వరల్డ్ కప్ అనే ఊహాగానాలు క్రికెట్ వర్గాల్లో జోరుగా వినిపిస్తున్నాయి. దీంతో ఐసీసీ నిర్వహించే ఈ టోర్నీపై మరింత ఆసక్తి నెలకొంది. ఈసారి ఎవరు కప్ను నెగ్గుతారోనని అందరూ ఇంట్రెస్టింగ్గా ఎదురు చూస్తున్నారు. టీమిండియా మాత్రం 2011 సీన్ను రిపీట్ చేయాలని చూస్తోంది. ఆ ఏడాది కూడా వరల్డ్ కప్ భారత్లోనే జరిగిన విషయం విదితమే. మళ్లీ స్వదేశంలో టోర్నీ జరుగుతున్నందున టీమిండియా కప్ నెగ్గాలని ఫ్యాన్స్ కూడా బలంగా కోరుకుంటున్నారు.
వరల్డ్ కప్కు ముందు సాధ్యమైనంత లిమిటెడ్ ఓవర్ల క్రికెట్ ఆడి టోర్నీకి సన్నద్ధంగా ఉండాలని అన్ని టీమ్స్ భావిస్తున్నాయి. అయితే ఇంగ్లండ్ ఫ్యాన్స్ ఆశలపై వరల్డ్ కప్-2019 హీరో బెన్ స్టోక్స్ నీళ్లు చల్లాడు. భారత్ ఆతిథ్యం ఇస్తున్న ప్రపంచ కప్ టోర్నీకి తాను అందుబాటులో ఉండే ఛాన్స్ లేదని కుండబద్దలు కొట్టాడు. యాషెస్ సిరీస్ ముగిసిన అనంతరం తాను హాలీ డే ట్రిప్నకు వెళ్తున్నానని స్టోక్స్ తెలిపాడు. అతడి కామెంట్స్తో ఇంగ్లీష్ టీమ్ అభిమానులు తలలు పట్టుకుంటున్నారు. జట్టుకు మళ్లీ కప్ను అందిస్తాడనుకుంటే ఇలా హాలీ డే ట్రిప్నకు వెళ్తానని చెప్పడం ఏంటని షాక్ అవుతున్నారు. ఇకపోతే, స్వదేశంలో 2019లో జరిగిన వరల్డ్ కప్ ఈవెంట్లో ఇంగ్లండ్ ఫస్ట్ టైమ్ ఛాంపియన్గా అవతరించిన సంగతి తెలిసిందే.
న్యూజిలాండ్తో లండన్లో జరిగిన ఫైనల్లో నరాలు తెగే ఉత్కంఠ నడుమ స్టోక్స్ సూపర్ ఇన్నింగ్స్ కారణంగా మ్యాచ్ టై అయింది. సూపర్ ఓవర్లో విజయం ఇంగ్లండ్ను వరించింది. ఈ నేపథ్యంలో ఈ ఏడాది అక్టోబర్ 5 నుంచి మొదలుకానున్న ఐసీసీ మెగా టోర్నీలో డిఫెండింగ్ ఛాంపియన్గా ఇంగ్లండ్ బరిలోకి దిగనుంది. కాగా, టీమ్తో పాటు ఫ్యాన్స్కు ఊహించని షాక్ ఇస్తూ గతేడాది వన్డేలకు గుడ్ బై చెప్పాడు స్టోక్స్. కానీ ఇంగ్లండ్ పరిమిత ఓవర్ల కోచ్ మాథ్యూ మాట్, కెప్టెన్ జోస్ బట్లర్ చేసిన వ్యాఖ్యలతో ఈ స్టార్ ఆల్రౌండర్ రీఎంట్రీ ఇస్తాడని అందరూ అనుకున్నారు. కానీ స్టోక్స్ మాత్రం రిటైర్మెంట్ను వెనక్కి తీసుకునే ఉద్దేశం లేదని క్లారిటీ ఇచ్చాడు. తాను రిటైర్ అయ్యానని.. ఈ టెస్టు ముగిసిన తర్వాత సెలవులు తీసుకుంటానని స్పష్టం చేశాడు. దీంతో బెన్ స్టోక్స్ వరల్డ్ కప్ ఆడే అవకాశం లేదని తేలిపోయింది.
