జిహ్మకో రుచి.. పుర్రెకో బుద్ధి అన్నట్లు.. ఒక్కోరి ఆలోచనలు ఒక్కో విధంగా ఉంటాయి. కొంత మంది ప్రతీ దానిలో కొత్తదనం కోరుకుంటూ ఉంటారు. ఇలాంటి సమయంలో పిచ్చి పిచ్చి పనులు కూడా చేస్తుంటారు. తాజాగా, ఓ వ్యక్తి జెల్లీ ఫిష్‌ను రుచి చూడాలని భావించాడు. చివరకు అనుకోని అనుభవం ఎదురై బిక్కముఖం వేశాడు. ఆ వివరాల్లోకి వెళితే.. విదేశానికి చెందిన ఓ వ్యక్తి కొద్దిరోజుల క్రితం తన బోటులో సముద్రంలో చేపలు వేటాడ్డానికి వెళ్లాడు. సముద్రంలో వల వేయగా అతడికి ఓ జెల్లీ ఫిష్‌ పడింది.
దాన్ని అతడు తన చేతుల్లోకి తీసుకున్నాడు. ఎంతో మెత్తగా.. అంతా కనిపిస్తూ ఉన్న దాన్ని చూడగానే అతడికి కొరకాలని అనిపించింది. దీంతో దాన్ని నోటితో కొరికాడు. అంతే! ఏమైందో ఏమో కానీ.. ముఖం మొత్తం ఆముదం తాగిన వాడిలా పెట్టాడు. తర్వాత ఆ జెల్లీ ఫిష్‌ను పక్కకు పడేశాడు. కొన్ని నిమిషాల పాటు విలవిల్లాడిపోయాడు. దీన్నంతా అతడితో పాటు వేటకు వచ్చిన వ్యక్తి వీడియో తీశాడు. తర్వాత దాన్ని తన సోషల్‌ మీడియా ఖాతాలో షేర్‌ చేశాడు. ఆ వీడియో కాస్తా వైరల్‌గా మారింది.
ఆ వీడియోపై స్పందిస్తున్న నెటిజన్లు.. ‘‘ జెల్లీ ఫిష్‌లలో కొన్ని విష పూరితమైనవి ఉంటాయి. వాటిని తాకినా చాలు ప్రాణాలు పోతాయి’’.. ‘‘ సముద్రపు జీవులతో చాలా జాగ్రత్తగా ఉండాలి. లేదంటే ప్రాణాలకు ముప్పు వస్తుంది’’.. ‘‘జెల్లీ ఫిష్‌ అంటే రుచిగా ఉంటుందని అనుకున్నట్లు ఉన్నాడు పాపం’’..‘‘ ప్రాణుల్ని హింసించే వారికి ఇలానే కావాలి’’ అంటూ కామెంట్లు చేస్తున్నారు. మరి, జెల్లీ ఫిష్‌ను కొరకటానికి ప్రయత్నించి ఇబ్బందుల పాలైన ఈ వ్యక్తిపై మీ అభిప్రాయాలను కామెం‍ట్ల రూపంలో తెలియజేయండి.
