గన్నవరం ఎమ్మెల్యే వల్లభనేని వంశీ మోహన్‌ కాన్వాయ్‌ ప్రమాదానికి గురైంది. ఆయన కాన్వాయ్‌లోని కార్లు ఒకదానితో ఒకటి ఢీకొట్టుకోవటంతో ఈ ప్రమాదం జరిగింది. శనివారం ఉదయం విజయవాడ నుంచి హైదరాబాద్‌ వెళ్తుండగా ఈ సంఘటన చోటుచేసుకుంది. సూర్యాపేట చివ్వెంల మండలం ఖాసీంపేట వద్ద వంశీ కాన్వాయ్‌లోని వాహనాలు ఒకదానితో ఒకటి ఢీకొట్టుకున్నాయి.
ఈ క్రమంలో ఎమ్మెల్యే వంశీ ప్రయాణిస్తున్న కారు కూడా ప్రమాదానికి గురైంది. ఇక, ఈ ఘటనలో ఎమ్మెల్యే వంశీకి ఎటువంటి గాయాలు కాలేదు. ఆయన క్షేమంగా బయటపడ్డారు. ఎమ్మెల్యేతో పాటు ఆయన అనుచరులు, సిబ్బందిలో ఎవ్వరికీ కూడా ఎలాంటి గాయాలు కాలేదు. దీంతో అందరూ ఊపిరి పీల్చుకున్నారు. ఈ ప్రమాదం ఎలా జరిగిందన్న సమాచారం తెలియరావాల్సి ఉంది.
