హైదరాబాద్ మహా నగరంలో రోజు రోజుకు దొంగల ముఠాల సంఖ్య పెరిగిపోతోంది. ఇప్పటికే భాగ్యనగరంలో చెడ్డీ గ్యాంగ్ హల్ చల్ చేస్తుంటే.. వీరికి తోడు ఇంకో దొంగల ముఠా ఇప్పుడు హైదరాబాద్ వాసులను భయాందోళనకు గురిచేస్తోంది. చెడ్డీ గ్యాంగ్ ఓ వైపు.. కొత్తగా వచ్చిన ఆడ దొంగల ముఠా మరోవైపు భాగ్యనగర వాసులకు నిద్రలేకుండా చేస్తున్నాయి. తాజాగా నగరంలో తిరుగుతున్న ఆడ దొంగలు ఇంట్లోకి చొరబడి సెల్ ఫోన్స్, ల్యాప్ టాప్ లు ఎత్తుకెళ్తున్నారు. వీరికి సంబంధించిన దృశ్యాలు ఓ ఇంటి సీసీకెమెరాలో రికార్డు అయ్యాయి.
భాగ్యనగరంలో ఓ ఆడ దొంగల ముఠా సంచరిస్తోంది. ఎవరూ లేని సమయంలో ఇంట్లోకి చొరబడి అందిన కాడికి దోచుకోవడం, ఆ సొమ్ముతో ఉడాయించడం వీరి పని. చూడ్డానికి శాలువాలు కప్పుకుని పేద వారిగా కనపడుతుంటారు. పగలంతా రెక్కీ నిర్వహించి.. రాత్రి పూట తమ పని కానిచ్చేస్తుంటారు ఈ కి’లేడీ’లు. ల్యాప్ టాప్ లు, సెల్ ఫోన్లు చోరీ చేస్తున్న ఓ లేడీ దొంగల ముఠా సీసీకెమెరాకు చిక్కింది. ఈ ఫుటేజీలో ముగ్గురు మహిళలు కనిపించారు. వారు చోరీ చేసిన వస్తువులను సంచిలో దాస్తున్న దృశ్యాలు ఓ ఇంటి సీసీటీవీ కెమెరాలో రికార్డు అయ్యాయి. వీటి ఆధారంగా పోలీసులు రంగంలోకి దిగి దర్యాప్తు చేస్తున్నారు. ఇప్పటికే చడ్డీ గ్యాంగ్ తో ఆందోళన పడుతున్న నగరవాసులకు ఈ లేడీ దొంగల ముఠా కంటి మీద కునుకులేకుండా చేస్తోంది. చెడ్డీ గ్యాంగ్ కన్న డేంజర్ గా వీళ్లు కనిపిస్తున్నారు.
ఇదికూడా చదవండి: ఇలాంటి చావు ఎవరికీ రాకూడదు! కంటతడి పెట్టిస్తున్న విషాద ఘటన
