ప్రభాస్‌ ఫ్యాన్స్‌తో పాటు భారత దేశ సగటు సినీ ప్రియుడు ఎంతగానో ఎదురుచూస్తున్న ‘సలార్‌’ రిలీజ్‌ డేట్‌ అనౌన్స్‌ అయిపోయింది. సలార్‌ సినిమా డిసెంబర్‌ 22న ప్రేక్షకుల ముందుకు రానుంది. ఈ నేపథ్యంలో సలార్‌ సినిమాతో ప్రభాస్‌ సృష్టించబోయే రికార్డుల గురించి దేశ వ్యాప్తంగా చర్చ మొదలైంది. కలెక్షన్ల విషయంలో ప్రస్తుతం టాప్‌లో ఉన్న కింగ్ ఖాన్.. షారుఖ్‌కు ప్రభాస్‌కు పోటీ పెట్టేస్తున్నారు నెటిజన్లు. షారుఖ్‌ వరుసగా రెండు 1000 కోట్ల సినిమాలు ఇచ్చాడని, ప్రభాస్‌ సత్తా ఏంటో సలార్‌తో తెలిసిపోతుందని అంటున్నారు.
అయితే, ప్రభాస్‌ ఫ్యాన్స్‌ మాత్రం ధీమా వ్యక్తం చేస్తున్నారు. సలార్‌ సినిమాతో రికార్డులు తుడుచుకుపెట్టుకుపోతాయని అంటున్నారు. షారుఖ్‌ రెండు సినిమాలతో కలిపి 2000 కోట్లు కలెక్ట్‌ చేస్తే.. ప్రభాస్‌ కేవలం బాహుబలి 2 సినిమాతో ఏకంగా 1800 కోట్లు కలెక్ట్‌ చేశాడని అంటున్నారు. ప్రభాస్‌తో షారుఖ్‌కు ఎక్కడా పోటీ పెట్టలేమంటున్నారు. ప్రభాస్‌ ప్లాప్‌ సినిమాలకు ఫస్ట్‌డే వచ్చే కలెక్షన్లు.. షారుఖ్‌ హిట్‌ సినిమాకు రావని అంటున్నారు. సలార్‌ మొదటి రోజు 200 కోట్లు కలెక్ట్‌ చేసినా ఆశ్చర్యపోవాల్సిన అవసరం లేదుంటున్నారు.
కేజీఎఫ్‌ సినిమాలతో దేశ వ్యాప్తంగా ప్రభంజనం సృష్టించిన ప్రశాంత్‌ నీల్‌.. రికార్డులను ఓ సారి తిరగేయమంటున్నారు. ఆయన తీసింది మూడు సినిమాలే అయినా.. ఇప్పటి వరకు ఏ దర్శకుడు సాధించని ఘనతను ఆయన సాధించాడంటున్నారు. కేజీఎఫ్‌ రెండు సినిమాలతో కలిపి దాదాపు 1600 కోట్ల రూపాయలు కొల్లగొట్టాడని చెప్తున్నారు. అలాంటి ఇద్దరు ఉద్దండుల కలయికలో వస్తున్న ‘సలార్‌’ సినిమాకు రికార్డులు ఓ లెక్క కాదంటున్నారు. ఈ ఇద్దరికీ సౌత్‌తో పాటు నార్త్‌లోనూ క్రేజ్‌ ఉందని, కలెక్షన్లు తన్నుకుంటూ వస్తాయని ధీమా వ్యక్తం చేస్తున్నారు.
