ఇటీవల కాలంలో ఎలక్ట్రిక్ బైక్ బ్యాటరీలు, వాహనాల పేలుళ్ల ఘటనలు వరుసగా చోటుచేసుకుంటున్నాయి. కొన్ని ఘటనల్లో ప్రాణనష్టం లేకపోయినా.. మరికొన్ని ఘటనల్లో వ్యక్తులు ప్రాణాలు కోల్పోయారు. ఈ పేలుడు ఘటనలు ఎలక్ట్రిక్ బైక్ లను కొనుగోలు చేయాలనుకునే వాహనదారుల్లో వణుకు పుట్టిస్తున్నాయి. తాజాగా తెలంగాణలోని సిద్ధిపేట జిల్లాలో చార్జింగ్ పెట్టి ఉన్న ఓ ఎలక్ట్రిక్ వాహనంలో బ్యాటరీ అమాంతం పేలిపోయింది.
బ్యాటరీ పేలుడు ఘటనలో ప్రాణనష్టం లేకపోయినా.. ఓ ఇల్లు పూర్తిగా దగ్ధమైంది. దుబ్బాక మండలం పెద్దచీకోడు గ్రామంలో పుట్ట లక్ష్మీనారాయణ అనే వ్యక్తి మంగళవారం రాత్రి తన ఎలక్ట్రిక్ వాహన బ్యాటరీకి ఇంటిముందు చార్జింగ్ పెట్టాడు. చార్జింగ్ ఉండగానే బ్యాటరీ పేలడంతో.. పెద్దఎత్తున మంటలు చెలరేగి.. ఇంటికి అంటుకున్నాయి. ఈ ఘటనలో లక్ష్మీనారాయణ ఇల్లు పూర్తిగా కాలి దగ్ధమైంది.
