అంద‌రి చూపూ ర‌జ‌నీ వైపే.. మ‌రి ఆయ‌న‌..?

త‌మిళ‌నాడులో రాజ‌కీయాలు మ‌రోసారి చ‌ర్చ‌నీయాంశంగా మారాయి. ప్ర‌ముఖ న‌టి ఖుష్బూ కాంగ్రెస్ నుంచి బీజేపీలో చేరిన విష‌యం తెలిసిందే. ఇక నుంచి బీజేపీ బ‌లోపేతానికి కృషి చేయ‌డ‌మే త‌న ల‌క్ష్య‌మ‌ని ప్ర‌క‌టించారు. వ‌చ్చే ఏడాది ప్రారంభంలోనే ఎన్నిక‌లు ఉండే అవ‌కాశాలు ఉండ‌డంతో అన్నాడీఎంకే, డీఎంకే కూడా రాజ‌కీయాల‌కు ప‌దును పెడుతున్నాయి. ఇవ‌న్నీ ఒక ఎత్త‌యితే సూప‌ర్ స్టార్ ర‌జ‌నీకాంత్ పార్టీపై చ‌ర్చ‌లు మ‌రో ఎత్తుగా మారాయి. ఆయ‌న పార్టీ పెట్ట‌క ముందే రజనీకాంత్‌తో పొత్తు కుదుర్చుకునేందుకు బీజేపీ, కాంగ్రెస్‌, అమ్మామక్కల్‌ మున్నేట్ర కళగం పార్టీలు రహస్యంగా మంతనాలు జ‌రుపుతున్న‌ట్లు ప్ర‌చారం జ‌రుగుతోంది. రాజకీయ అరంగేట్రం చేస్తానని రెండేళ్ల ముందే ప్రకటించిన రజనీకాంత్‌ ఇంకా పార్టీని ప్రారంభించలేదు. ఈ డిసెంబర్‌లోగా ఆయన పార్టీ ప్రారంభించి వచ్చే యేడాది జరిగే అసెంబ్లీ ఎన్నికలకు సిద్ధం అవుతార‌ని అంద‌రూ భావిస్తున్నారు.

గ‌త ఫిబ్ర‌వ‌రిలో లీకులు..

గత ఫిబ్రవరిలో చెన్నైలో మీడియా ప్రతినిధుల సమావేశంలో అసెంబ్లీ ఎన్నికల్లో తన పార్టీ తప్పకుండా పోటీ చేస్తుందని, తాను సీఎం పదవికి దూరంగా ఉండి పార్టీ అధ్యక్షుడిగా కొనసాగిస్తానని రజనీ ప్రకటించిన విషయం తెలిసిందే. నాటి నుంచీ ర‌జ‌నీ పార్టీపై వార్త‌లు చ‌లామ‌ణి అవుతూనే ఉన్నాయి. ఇదే క్ర‌‌మంలో అన్నాడీఎంకే, డీఎంకే పార్టీలు మిత్రపక్షాలకు వచ్చే అసెంబ్లీ ఎన్నికల్లో తక్కువ స్థానాలను మాత్రమే కేటాయించాలని భావిస్తున్న‌ట్లు తెలుస్తోంది. ఈ కారణంగా ఆ పార్టీలకు మిత్రపక్షాలైన బీజేపీ, పీఎంకే, డీఎండీకే పార్టీలు రజనీ పెట్టబోయే పార్టీవైపు దృష్టిసారిస్తున్నాయి. ఆ దిశగా డీఎంకే కూటమిలో ఉన్న వామపక్షాలు, డీపీఐ, ఎండీఎంకే ప్రముఖులు కొందరు రజనీకాంత్‌తో రహస్యంగా ఫోన్‌లో చర్చిస్తున్నారు. పార్టీ ప్రారంభించక ముందే పొత్తులపై చర్చలెందుకని రజనీ వారిని ప్రశ్నించినట్లు విశ్వసనీయ సమాచారం.

ర‌జ‌నీ, క‌మ‌ల్ క‌లిస్తే…

రజనీ పార్టీ ప్రారంభిస్తే తన సినీరంగ చిరకాలపు మిత్రుడు కమల్‌హాసన్‌ నాయకత్వంలోని మక్కల్‌ నీదిమయ్యం పార్టీని కూటమిలో చేర్చుకునే అవకాశం ఉంది. గతంలో కమల్‌హాసన్‌ ఏర్పాటు చేసిన సభలో రజనీ మాట్లాడుతూ భవిష్యత్‌ రాజకీయ అవసరాల కోసం ప్రజా సంక్షేమం దృష్టిలో పెట్టుకుని కమల్‌ పార్టీతో చేతులు కలుపుతానని ప్రకటించారు. మక్కల్‌ నీది మయ్యం తర్వాత రజనీ జాతీయ పార్టీ బీజేపీతో పొత్తు పెట్టుకోవడం ఖాయమని చెబుతున్నారు. తరచూ ఆయన కేంద్రంలోని బీజేపీ ప్రభుత్వానికి మద్దతుగా ప్రకటనలు కూడా చేస్తున్నారు. ఈ నేపథ్యంలోనే బీజేపీ నేతలు రజనీతో పొత్తుల దిశగా చర్చలు జరుపుతున్నారు. అదే సమయంలో కాంగ్రెస్‌ కూడా రజనీ పార్టీతో పొత్తుపెట్టుకోవాలని పావులు కదుపుతోంది. రజనీకాంత్‌తో చిరకాల మిత్రులుగా ఉన్న కాంగ్రెస్‌ రాష్ట్ర శాఖ నేతలు ఇప్పటికే ఆయనతో ఎన్నికల పొత్తుపై రెండు మూడుసార్లు చర్చలు జరిపినట్లు తెలుస్తోంది.

ఇక దినకరన్‌ నాయకత్వంలోని అమ్మా మక్కల్‌ మున్నేట్ర కళగం కూడా రజనీ పార్టీ దిశగానే అడుగులు వేస్తోంది. రాందాస్‌ నాయకత్వంలోని పీఎంకే కూడా ఈ సారి కొత్త పార్టీలతో పొత్తుపెట్టుకోవాలనే భావిస్తోంది. పీఎంకే యువజన విభాగం అధ్యక్షుడు అన్బుమణి రాందాస్‌కు రజనీకాంత్‌కు మొదటినుండి సన్నిహిత సంబంధాలున్నాయి. అన్నాడీఎంకే గనుక అడిగినంత సీట్లు ఇవ్వకుంటే వచ్చే అసెంబ్లీ ఎన్నికల్లో డీఎంకేతోనో, రజనీ పెట్టబోయే పార్టీతోనూ పొత్తుకుదుర్చుకుని బరిలోకి దిగాలని ఆ పార్టీ వ్యూహరచన చేస్తోంది ఇప్పటికే పీఎంకే సీనియర్‌ నేతలు కొందరు రజనీతో చర్చలు జరుపుతున్నట్లు తెలుస్తోంది. ఏది ఏమైనప్పటికీ రజనీ కొత్త పార్టీ పెడితే మ‌రో కొత్త కూట‌మి ఆవిర్భ‌వించే అవ‌కాశాలు క‌నిపిస్తున్నాయి.

12361